Firing : अमेरिकेतील एका शाळेत गोळीबार झाल्याची धक्कादायक माहिती समोर आली आहे. या गोळीबारामध्ये चार जणांचा मृत्यू झाला असून याव्यतिरिक्त १२ हून अधिक जण गंभीररित्या जखमी झाले आहेत. ही घटना अमेरिकेच्या मिसिसिपीतील एका हायस्कूलमध्ये घडल्याचे म्हटले जात आहे. या घटनेमुळे परिसरात मोठी खळबळ उडाली आहे.

मिळालेल्या माहितीनुसार, मिसिसिपीतील लेलँड येथील एका हायस्कूलमध्ये अंदाधुंद गोळीबार करण्यात आला. यात चौघांचा मृत्यू झाला, तर बारा जण जखमी झाले आहेत. जखमींपैकी चार जणांना हेलिकॉप्टरने स्थानिक रुग्णालयात नेण्यात आले. महापौर जॉन ली यांनी या घटनेचा तपास सुरु असल्याचे सांगताना मृतांची आणि जखमींची संख्या वाढू शकते असे म्हटले आहे.

सीबीएसच्या वृत्तानुसार, हायस्कूलमध्ये गोळीबार मध्यरात्रीच्या सुमारास झाला. गोळीबारामध्ये चौघेजण ठार झाले आणि डझनभराहून अधिक जण जखमी झाले. गोळीबारात २० पेक्षा जास्त लोकांना गोळ्या लागल्या. मृतांची ओळख अद्याप पटलेली नाही, तसेच संशयिताची ओळखही पटलेली नाही, अशी माहिती मिसिसिपीचे सिनेटक डेरिक सिमन्स यांनी सांगितले आहे.

या गोळीबारात प्रकरणाच्या तपासात मिसिसिपी ब्युरो ऑफ इन्व्हेस्टिगेशन (एमबीआय) ही लेलँड पोलिसांना मदत करणार आहे. वॉशिंग्टन काउंटीमधील मिसिसिपीतील लेलँड या शहरात ही गोळीबाराची घटना घडली. मृतांच्या, जखमींच्या संख्येत वाढ होऊ शकते असे मिसिसिपी पोलिस विभागाच्या (एमडीपीएस) प्रवक्त्या बेली मार्टिन यांनी म्हटले आहे.