Donald Trump Latest News : "मी नसतो तर तुम्ही आज तुरुंगात असता!"... अमेरिकेचे राष्ट्राध्यक्ष डोनाल्ड ट्रम्प यांनी थेट इस्रायलचे पंतप्रधान बेंझामिन नेतान्याहू यांना फोनवर अशी कडक तंबी दिल्याचा मोठा दावा समोर आला आहे. यानंतर आंतरराष्ट्रीय वर्तुळात खळबळ उडाली आहे. इराण आणि इस्रायलमधील तणाव निवळण्यासाठी ट्रम्प यांनी मध्यस्थी केली. पण या दरम्यान ट्रम्प आणि नेतान्याहू यांच्यात फोनवर हाय-व्होल्टेज ड्रामा घडल्याची माहिती सूत्रांनी दिली आहे. इस्रायली सैन्याने लेबनॉनमध्ये घुसण्याचा प्रयत्न केल्यानंतर ट्रम्प प्रचंड संतापले होते. त्यांनी फोनकरून इस्रायलचे पंतप्रधान बेंझामिन नेतान्याहू यांना झापल्याचे वृत्त समोर आले आहे.

अॅक्सिऑस यांनी डोनाल्ड ट्रम्प आणि इस्रायलचे पंतप्रधान बेंझामिन नेतान्याहू यांच्यातील फोनवरील संभाषणाचे वृत्त दिले आहे. ट्रम्प यांनी नेतान्याहू यांना फोनवर वेडा आहेस का? मी नसतो तर तुरूंगात असता.. अशी थेट धमकी दिल्याचे या वृत्तात म्हटले आहे. लेबनॉनमधील हिजबुल्लाहविरुद्ध इस्रायलच्या वाढत्या लष्करी कारवाईमुळे ट्रम्प नाराज झाले. कारण त्यामुळे इराणसोबत सुरू असलेल्या शांतता चर्चेत अडथळा येऊ शकते . दरम्यान, ट्रम्प यांच्या युद्धबंदीच्या घोषणेनंतरही, इस्रायली सैन्याने सांगितले की लेबनॉनमधून इस्रायली भूभागाच्या दिशेने दोन रॉकेट डागण्यात आले, जे हवेतच पाडण्यात आले.

तुम्ही पूर्णपणे वेडे आहात

सूत्रांच्या दाव्यानुसार, ट्रम्प यांनी नेतान्याहूंना कडक शब्दांत झापलंय. "माझ्या पाठिंब्यामुळेच तुम्ही खुर्चीवर आहात, नाहीतर आज तुरुंगात असता", असं ट्रम्प यांनी थेट सुनावल्याचं म्हटलं जातंय. ट्रम्प नेतान्याहू यांना म्हणाले, "तुम्ही पूर्णपणे वेडे आहात. जर मी नसतो, तर तुम्ही आतापर्यंत तुरुंगात असता. मी तुमचा जीव वाचवत आहे. आता प्रत्येकजण तुमचा द्वेष करतो. म्हणूनच प्रत्येकजण इस्रायलचा द्वेष करतो." ट्रम्प यांच्या या आक्रमक भूमिकेनंतर इस्रायलने माघार घेतल्याची चर्चा आंतरराष्ट्रीय वर्तुळात आहे.

तणाव अखेर निवळला -

इराण आणि अमेरिकेदरम्यान शस्त्रसंधीवरून (Ceasefire) निर्माण झालेला मोठा तणाव अखेर निवळला आहे. इस्रायलने आपल्या सैन्याला लेबनॉनमध्ये शिरण्याचे आदेश दिल्यानंतर ही चर्चा काही काळ थांबली होती. पण अमेरिकेचे राष्ट्राध्यक्ष डोनाल्ड ट्रम्प यांच्या यशस्वी मध्यस्थीनंतर आता इस्रायल आणि हिजबुल्ला यांनी एकमेकांवरील हल्ले थांबवण्याचे मान्य केले आहे. इस्रायली सैन्य लेबनॉनमधून अखेर माघारी फिरले आहे. तणाव कमी झाल्यानंतर आता इराणसोबत अत्यंत वेगाने चर्चा सुरू असल्याची माहिती डोनाल्ड ट्रम्प यांनी दिली आहे .