सासरच्यांची हुंड्याची मागणी पूर्ण न झाल्यामुळे त्यांनी सुनेला चक्क एचआयव्ही संक्रमित इंजेक्शन टोचलंय. ही धक्कादायक घटना उत्तर प्रदेशातील सहारनपूर जिल्ह्यातील गंगोह पोलीस स्टेशन परिसरात घडली आहे. पीडित तरूणीची प्रकृती गंभीर असून, तरूणीच्या तक्रारीवरून पोलिसांनी सासरच्या मंडळींविरोधात गुन्हा दाखल केला आहे. या घटनेनंतर परिसरात एकच खळबळ उडाली आहे.

पोलीस अधिकाऱ्यांनी दिलेल्या माहितीनुसार, पीडित तरूणीच्या वडिलांनी तक्रार दाखल केली आहे. त्यात त्यांनी मुलगी सोनल हिचा विवाह १५ फेब्रुवारी २०२३ साली उत्तराखंडमधील हरिद्वार येथील अभिषेकशी झाला होता. लग्नात त्यांनी हुंड्यात रोख रक्कम, दागिने आणि कार दिली होती. तरी देखील सासरच्या मंडळींकडून २५ लाख रूपये आणि एक चारचाकी वाहनाची मागणी केली जात होती.

पीडितेच्या कुटुंबाने या मागण्या पूर्ण करण्यास नकार दिला. याच गोष्टीचा राग मनात धरून सासरच्या मंडळींनी पीडित तरूणीला घराबाहेर हाकलून लावले. पंचायतीने नंतर तरूणीला तिच्या सासरच्या घरी पाठवले. या काळात तिच्या सासरच्या मंडळींनी सोनलचा जाच केला आणि तिला एचआयव्ही संक्रमित इंजेक्शन टोचले. तसेच तिला मारण्याचाही प्रयत्न केला.

तरूणीची तब्येत बिघडल्यानंतर, तिच्या पालकांनी तिला रूग्णालयात दाखल केलं. रूग्णालयात दाखल केल्यानंतर तिची तपासणी केली. तेव्हा तरूणी एचआयव्ही पॉझिटिव्ह असल्याचं आढळून आले. पालकांनी नंतर पोलीस ठाण्यात जात सासरच्या मंडळींविरोधात तक्रार दाखल केली. नंतर न्यायासाठी न्यायालयात धाव घेतली.

अतिरिक्त मुख्य न्यायदंडाधिकारी न्यायालयाच्या आदेशानंतर, ११ फेब्रुवारीला गंगोह पोलीस ठाण्यात सोनलचा पती आणि मेहुण्यासह ४ जणांविरूद्ध गुन्हा दाखल करण्यात आला आहे. या प्रकरणाची अधिक चौकशी सुरू आहे.