समाजवादी पक्षाचे खासदार रामजीलाल सुमन यांच्या ताफ्यावर करणी सेनेच्या कार्यकर्त्यांनी हल्ला केलाय. करणी सेनेच्या कार्यकर्त्यांनी खासदारांच्या ताफ्याला काळे झेंडे दाखवले. यादरम्यान खासदारांच्या ताफ्यातील गाड्या एकमेकांवर आदळल्या. खासगदार रामजीलाल सुमन यांच्या ताफा जेव्हा लोढा पोलीस स्टेशन परिसरातील खेरेश्वर चौक महामार्गावरून जात होता, त्यावेळी हा अपघात झाला. या धडकेत अनेक वाहनांचे नुकसान झाले आहे.

करणी सेनेच्या कार्यकर्त्यांना पाहून ताफ्यातील वाहन चालकांमध्ये भीती पसरली. त्यामुळे सर्वात पुढे चालणाऱ्या एका कार चालकाने आपल्या वाहनाचा ब्रेक लावला. त्यामुळे इतर वाहने एकमेकांवर आदळली. या घटनेनंतर लगेचच रामजीलाल सुमन यांनी परिस्थितीचा आढावा घेतला आणि नंतर गभाना-बुलंदशहरला रवाना झालेत.

अलीगडच्या खेरेश्वर चौराहा महामार्गावर झालेल्या या अपघातात कोणीही गंभीर जखमी झाल्याचे वृत्त नाही, परंतु वाहनांचे नुकसान झाले आहे. सपा खासदाराच्या ताफ्यावर टायर फेकण्यात आल्याचे सांगितलं जात आहे. शहराचे पोलीस अधीक्षक मृगांक शेखर पाठक म्हणाले की, रामजी लाल सुमन यांच्या ताफ्यावर टायर फेकण्यात आलेत. या संदर्भात गभाना पोलीस ठाण्यात गुन्हा दाखल करण्यात आला असून आवश्यक ती कारवाई केली जाईल.

एसपी म्हणाले की, घटनेनंतर खासदार रामजी लाल सुमन यांना अलीगढच्या पुढे सुरक्षितपणे काढण्यात आले. या हल्ल्यात कोणीही जखमी झाले नाही आणि या घटनेनंतर परिसरात शांतता आहे.