उत्तर प्रदेशमधून मोठी बातमी समोर आली आहे. हवेत तांत्रिक बिघाड आढळून आल्यामुळे उपमुख्यमंत्री केशव प्रसाद मौर्य यांच्या हेलिकॉप्टरला लखनौमधील चौधरी चरण सिंह आंतरराष्ट्रीय विमानतळावर आपत्कालीन लँडिंग करावे लागले. मौर्य हे लखनौहून कौशांबीला एका कार्यक्रमाच्या उद्घाटनासाठी हेलिकॉप्टरने प्रवास करत असताना त्यांच्या हेलिकॉप्टरमधून धूर आल्यामुळे सुरक्षिततेच्या कारणास्तव लँडिंग करण्यात आलं.

मिळालेल्या माहितीनुसार, मौर्य सकाळी ११:३० वाजता कौशांबी येथील शीतला देवी अतिथीगृहाजवळील सारस महोत्सवाच्या उद्घटनासाठी जाणार होते. तसेच तिकडच्या पक्षाच्या पदाधिकाऱ्यांशी संवाद साधणार होते. मात्र कौशांबी येथील कार्यक्रमासाठी मौर्य निघाले असता त्यांच्या उड्डाणादरम्यान अचानक हेलिकॉप्टरमध्ये धुराचे लोट येऊ लागले.

सुरक्षिततेच्या कारणास्तव पायलटने तातडीने विमान लखनऊकडे वळवले आणि विमानतळावर सुरक्षितपणे उतरवले. सुदैवाने या दुर्घटनेत कोणतीही जीवित हानी झाली नसून उपमुख्यमंत्री केशव प्रसाद मौर्य आणि हेलिकॉप्टरमधील इतर सर्वजण सुरक्षित असल्याची माहिती अधिकाऱ्यांनी दिली आहे. तसेच हेलिकॉप्टरमधील बिघाडाचे नेमके कारण शोधण्यासाठी अधिकारी आता हेलिकॉप्टरची तपासणी करणार आहेत.