नेपाळच्या उत्तर पूर्व (ईशान्य) भागातील यालुंग री पर्वतावर सोमवारी सकाळी एका मोठी दुर्घटना घडली. ५,६३० मीटर उंचीच्या या शिखरावर झालेल्या हिमस्खलनात सात गिर्यारोहकांचा मृत्यू झाला. तर, चार जण गंभीर जखमी असल्याची माहिती समोर आली आहे. मिळालेल्या माहितीनुसार, चार गिर्यारोहक अजूनही बेपत्ता असल्याचे वृत्त आहे. मृतांमध्ये तीन अमेरिकन, एक कॅनेडियन, एक इटालियन आणि दोन नेपाळी नागरिकांचा समावेश आहे.

द काठमांडू पोस्टनुसार, यालुंग री पर्वतावर हिमस्खलन झाले. यालुंग री पर्वताची उंची ५,६३० इतकी असून, हे पर्वक बागमती प्रांतातील दोलखा जिल्ह्यातील रोलवालिंग व्हॅलीमध्ये स्थित आहे. सोमवारी सकाळी या पर्वतावरून हिमस्खलन झाले. हिमस्खलनामुळे अनेक गिर्यारोहक बर्फाखाली अडकले. हिमस्खलनाची माहिती मिळताच बचाव पथकाने घटनास्थळी धाव घेतली. यानंतर जखमींना बाहेर काढण्यासाठी आणि बेपत्ता लोकांचा शोध घेण्याचं काम पार पडलं.

४ गिर्यारोहक अजूनही बेपत्ता

जिल्हा पोलीस कार्यालयाचे उपअधीक्षक ज्ञामकुमार महातो यांनी सांगितले की, पर्वतावर झालेल्या हिमस्खलनामुळे एकूण ७ गिर्यारोहकांचा मृत्यू झाला. हे गिर्यारोहक इतर देशातील होते. दरम्यान, पर्यटन अधिकाऱ्यांनी समोवारी सांगितले की, खराब हवानामुळे शिखरावर चढाई करताना दोन इटालियन गिर्यारोहक बेपत्ता झाले. सध्या त्यांचा शोध सुरू आहे. आणखी २ गिर्यारोहक बेपत्ता आहेत.

ट्रेकिंग एजन्सीज असोसिएशन ऑफ नेपाळचे अध्यक्ष सागर पांडे म्हणाले की, मंगळवारी जोरदार बर्फवृष्टी झाल्यापासून एक हजारहून अधिक ट्रेकर्स आणि पर्यटकांना वाचवण्यात आलं आहे. बचाव कार्य आव्हानात्मक बनले होते. हेलिकॉप्टर ऑपरेशन्सही कठीण झाले होते. आता हवामान सुधारले. काम वेगाने सुरू आहे. बाकी गिर्यारोहकांचा शोध सुरू आहे'.