खोकल्याचा त्रास कमी व्हावा म्हणून दिलेलं औषध कफ सिरप आता मुलांच्या जीवावर उठलंय... मध्य प्रदेशातील छिंदवाडा जिल्ह्यात 11 आणि राजस्थानमध्ये 3 मुलांच्या मृत्यूनंतर सरकारी यंत्रणेला जाग आलीय...मुलांच्या मृत्यूला कारणीभूत ठरलेल्या कोल्ड्रिफ या कफ सिरपवर मध्य प्रदेश, तामिळनाडू, केरळ आणि राजस्थान सरकारनं बंदी घालण्याचा निर्णय घेतलाय.तर दुसरीकडे लहान मुलांना कफ सिरप देऊ नये अशी गाईडलाईन केंद्रानं दिलीये...

कोल्ड्रिफ कफ सिरपमध्ये 48.6% डायथिलीन ग्लायकोल वापरले जाते. तर काही सिरपमध्ये विषारी इथिलिन ग्लायकॉलचा वापर केला जातो...इथिलिन ग्लायकॉल हे रंगहीन आणि गंधहीन अल्कोहोलिक संयुग आहे. औषध कंपन्या कफ सिरपमध्ये त्याचा भेसळ म्हणून वापर करतात..स्टॅम्प पॅडची शाई, पेनची शाई आणि रंगामध्ये इथिलिन ग्लायकॉलचा वापर केला जातो.. तर डायथिलीन ग्लायकॉल हे इंडस्ट्रीयल कामात वापरले जाते. मानवी शरीरात ते विषासारखे काम करतं. या ग्लायकॉलमुळे मुलांची किडनी, यकृत आणि मज्जासंस्थेचं गंभीर नुकसान होतं...

दरम्यान केंद्रीय औषध मानक नियंत्रण संस्थेने हिमाचल प्रदेश, उत्तराखंड, गुजरात, तामिळनाडू, मध्य प्रदेश आणि महाराष्ट्र या सहा राज्यांमधील औषध कारखान्यांची तपासणी सुरू केलीय. नागपुरात खोकल्यावरील काही औषधांची विक्री थांबवण्यात आलीय. या औषधांचे नमुने तपासणीसाठी पाठवण्यात आलेत. मध्य प्रदेशात कप सिरप औषध घेण्यासाठी प्रिस्क्रिप्शन लिहून देणारा डॉ. प्रवीण सोनी याला अटक करण्यात आलीय. त्यामुळे आता मुलांना खोकल्याचं ओषध देताना पालकांनीही सजग राहणे गरजेचे आहे.