Panchayat cash settlement in POCSO case : झारखंडममध्ये माणुसकीला लाजवणारी एक अत्यंत धक्कादायक घटना घडली आहे. गुमला जिल्ह्यात एका ३ वर्षांच्या चिमुरडीवर बलात्कार झाला, पण पीडित कुटुंबाला न्याय देण्याऐवजी तिथल्या पंचायतीने या गंभीर गुन्ह्याचा चक्क सौदा केला. पंचायतीच्या सदस्यांनी आरोपीच्या कुटुंबीयांकडून 'जागेवरच दंड' म्हणून २०,००० रुपये वसूल केले आणि हा गंभीर गुन्हा दाबण्याचा प्रयत्न केला. संतापजनक म्हणजे, हातात आलेले हे दंडाचे पैसे या पंचांनी स्वतःच्या खाण्यापिण्यावर आणि पार्टीवर उडवल्याची माहिती समोर आली आहे. अखेर पोलिसांनी गावात धाव घेऊन आरोपीला बेड्या ठोकल्या आहेत. त्याशिवाय या लाचखोर पंचांचीही चौकशी सुरू करण्यात आली आहे.

झारखंडच्या गुमला जिल्ह्यातील पंचायत सदस्यांनी एका ३ वर्षांच्या मुलीवरील बलात्काराचे प्रकरण दाबण्याचा प्रयत्न केल्याची घटना समोर आली. त्यासाठी त्या पंचांनी कुटुंबाकडून 'जागीच दंड' म्हणून २०,००० रुपये घेतले आणि त्या पैशांचा वापर मेजवानी आयोजित करण्यासाठी केला. आरोपीने ११ जुलै रोजी आई कामासाठी बाहेर गेली असताना त्या लहान मुलीची काळजी घेण्याचे आमिष दाखवून तिच्यावर बलात्कार केल्याचा आरोप आहे.

आईच्या इच्छेविरुद्ध पंचायतीमधील स्थानिक ज्युरीने रविवारी बैठक बोलावून १ लाख रुपयांचा दंड निश्चित केला. त्यापैकी २०% रक्कम सदस्यांना आगाऊ आणि उर्वरित रक्कम पीडितेच्या कुटुंबाला एका आठवड्याच्या आत द्यायची होती. त्यानंतर पंचायत प्रतिनिधींनी त्यांच्या वाट्याचा पैसा खाण्यापिण्यावर खर्च केला, असा आरोप मुलाच्या नातेवाईकांनी केला आहे. पोलिसांच्या एका पथकाने संध्याकाळी गावाला भेट देऊन संशयिताला अटक केली.

बचावलेल्या मुलीची दोनदा वैद्यकीय तपासणी करण्यात आली. त्या लहान मुलीचे आणि तिच्या आईचे जबाब मंगळवारी नोंदवण्यात येतील, असे पोलीस अधिकारी मोहन कुमार सिंह यांनी सांगितले. पॉक्सो प्रकरणातील एका संशयिताला पंचायत प्रतिनिधींनी पैशांच्या बदल्यात वाचवण्याचा प्रयत्न केला होता का? हे तपासण्यासाठी चौकशीची शिफारस अधिकाऱ्याने केली आहे.

काही पंचायत सदस्यांनी त्या पैशातून मेजवानी आयोजित केल्याच्या आरोपांची स्वतंत्रपणे चौकशी करण्यासाठी जिल्हा बाल कल्याण समिती, जिल्हा विधी सेवा प्राधिकरण आणि स्थानिक सर्कल ऑफिसर यांच्या प्रतिनिधींचा समावेश असलेली एक समिती मंगळवारी गावाला भेट देईल. "प्रशासनाने कथित गुन्ह्याच्या सर्व पैलूंची चौकशी करण्यासाठी जिल्हा पंचायत राज अधिकारी शिशिर कुमार सिंह आणि बीडीओ सुशील खाखा यांच्या नेतृत्वाखाली आधीच एक चौकशी समिती स्थापन केली आहे," असे गुमलाचे डीसी दिलेश्वर महतो यांनी सांगितले.