पावसाचा परतीचा प्रवास अखेर सुरू झाला आहे. मान्सूनच्या परतीच्या प्रवासाला राजस्थान, गुजरातच्या भागातून आजपासून सुरुवात झाल्याची माहिती हवामान खात्याने दिली आहे. 6 ऑक्टोबरपासून मान्सूनचा परतीचा प्रवास सुरू होणार असल्याचं भारतीय हवामान खात्याकडून 30 सप्टेंबरला सांगण्यात आलं होते. 1 जूनला पावसाला सुरूवात होऊन जून ते सप्टेंबर या तीन महिन्याच्या कालावधीत देशभरात 99 टक्के पाऊस झाला आहे.

गुजरातच्या काही भागातून, पूर्ण राजस्थान, पंजाब, हरियाणा, चंदीगड, दिल्ली, जम्मू-काश्मीर, लडाख, हिमाचल प्रदेश, उत्तराखंड, उत्तरप्रदेश, मध्यप्रदेशच्या अनेक भागातून मान्सूनच्या परतीसाठी पुढील 24 तास अनुकूल असल्याचे हवामान तज्ज्ञ के. एस. होसळीकर यांनी सांगितले आहे. होसळीकर यांनी ट्विट करून याबाबत माहिती दिली आहे.

यंदा नैऋत्य मान्सून वाऱ्यांपासून पडणाऱ्या पावसाच्या हंगामात मोठ्या प्रमाणात पाऊस झाल्याचं भारतीय हवामान खात्यानं यापूर्वीच सांगितलं होतं. यंदाचा नैऋत्य मान्सून हंगाम 1 जूनला सुरू झाला असून 30 सप्टेंबरला पुर्ण झाला. या हंगामात देशाच्या वायव्य भागात 96 टक्के, मध्य भागात 104 टक्के, पूर्व आणि ईशान्य भागांत 88 टक्के आणि दक्षिणेत 111 टक्के असं विभागनिहाय पाऊस पडला आहे. यापैकी जून महिन्यात 110 टक्के पाऊस पडला असल्याची माहिती हवामान खात्याने दिली आहे. जुलै आणि ऑगस्ट महिन्यांत पावसाचं प्रमाण अनुक्रमे 93 आणि 76 टक्के राहिलं.