इराण-इस्त्रायल युद्धादरम्यान एक मोठी घटना समोर आली आहे. श्रीलंकेच्या दक्षिण किनाऱ्याजवळ इराणी नौदलाच्या जहाजावर पाणबुडीने हल्ला केल्याची घटना समोर आली आहे. हल्ला झाल्यानंतर १०१ जण बेपत्ता झाले आहेत. तर ७८ जखमी झाले आहेत. त्यापैकी ३२ जणांची प्रकृती गंभीर असल्याचे सांगितले जात आहे.

भारतातील विशाखापट्टणम येथील मिलान २०२६ बहुराष्ट्रीय नौदल सरावात हे जहाज सहभागी झालं होतं. त्यानंतर इराणला परतताना हल्ला झाल्याचे सांगण्यात आलं आहे. श्रीलंकेचे परराष्ट्रीय मंत्री विजिता हेराथ यांनी संसदेत माहिती दिली आहे की, जहाजावर हल्ला झाल्याचा फोन आला. त्यानंतर श्रीलंकेच्या नौदल आणि हवाई दलाने तातडीने बचाव कार्य सुरू केलं. आतापर्यंत ३२ जणांना वाचवण्यात आलं आहे'. दरम्यान, श्रीलंकेच्या नौदलाच्या जवानांनी ३२ जखमींना रुग्णालयात दाखल केले असून त्यांच्यावर उपचार सुरू आहेत.

श्रीलंकेच्या नौदलाच्या सूत्रांनी सांगितलं की, 'जहाजावर एकूण १८० जण होते. घटनेची माहिती मिळताच बचाव कार्य सुरू करण्यात आलं. या हल्ल्याला अद्याप अधिकृत दुजोरा मिळालेला नाही. परंतु या हल्ल्याचं कनेक्शन अमेरिका, इस्त्रायल आणि इराणमध्ये सुरू असलेल्या युद्धजन्य परिस्थितीशी जोडलं जात आहे.

तत्पूर्वी, युद्धाच्या पाचव्या दिवशीही अमेरिका इस्त्रायलने तेहरानसह अनेक शहरांवर जोरदार हवाई हल्ले केले आहेत. इराणनेही इस्त्रायलवर क्षेपणास्त्र आणि ड्रोन हल्ले केले. या घटनेने आखाती देशात तणाव वाढला आहे.