मध्य प्रदेशच्या दमोह येथून खळबळजनक घटना समोर आली आहे. हटा पोलीस स्टेशनच्या हद्दीत शिक्षकासोबत धक्कादायक प्रकार घडला आहे. शिक्षकाला लूटल्यानंतर त्याला जिवंत जाळल्याचा प्रकार उघडकीस आला आहे. या घटनेत शिक्षकाचा मृत्यू झाला आहे.

मिळालेल्या माहितीनुसार, राजेश कुमार त्रिपाठी असे प्राथमिक शिक्षकाचे नाव आहे. राजेश कुमार हे सुनवाहा भागात राहत होते. राजेश कुमार हे उशिरा रात्री दुचाकीवरून हटा येथून सुनवाहाला निघाले होते. त्यावेळी लुटारूंनी शिक्षकाला थांबवलं. त्यांच्याजवळ एकूण ४ लाख रुपये होते. लुटारूंनी त्यांच्याजवळील ४ लाख रुपये हिसकावून घेतले. त्यानंतर शिक्षकाला मारहाण केली.

लुटारूंनी पुढे त्यांच्याजवळील पेट्रोल शिक्षकाच्या अंगावर टाकलं. लुटारूंनी शिक्षकाला पेट्रोल टाकून जिवंत जाळलं. या घटनेत शिक्षक राजेश यांचा मृत्यू झाला. मृत शिक्षकाचा भाऊ मुकेश त्रिपाठी यांनी सांगितलं की, 'शिक्षकाचे वाडवडील सुनवाहा गावात राहत होते. या गावात त्यांची जमीन आहे. हटा येथून त्यांचे भाऊ सुनवाहा येथे चालले होते. याचदरम्यान त्यांच्यासोबत भयंकर प्रकार घडला.

दरम्यान, लुटारूंच्या कृत्यानंतर शिक्षकाने फोन करून कुटुंबीयांना माहिती दिली. कुटुंबीयातील सदस्य घरी पोहोचले, तरीही आग विझली नव्हती. शिक्षक राजेश कुमार पाणी मागत होते. शिक्षकाच्या कुटुंबीयांनी दिलेल्या माहितीनुसार पोलिसांनी तपास सुरु केला आहे. तपासात पुरावे आढळतील, त्यानुसार कारवाई केली जाणार असल्याची माहिती पोलिसांनी दिली.

पोलिसांनी दिलेल्या माहितीनुसार, शिक्षकाची हत्या करणाऱ्या लुटारूंनी लवकरच अटक केली जाईल. घटनास्थळाच्या आसपासच्या लोकांची चौकशी सुरु करण्यात आली आहे. पोलिसांकडून सीसीटीव्ही फुटेज देखील तपासले जात आहेत. पुराव्यासाठी पोलिसांनी कसून तपास सुरु केला आहे.