Summary -

• क्रिकेट सामन्यात रन आऊटवरून वाद

• अंपायरवर चाकूने भोसकून हत्या

• दुसरा अंपायर हल्ल्यात जखमी

• आरोपी फरार असून पोलिस त्याचा शोध घेत आहेत

क्रिकेटच्या मैदानात अंपायरची चाकूने भोसकून हत्या करण्यात आली. रन आऊटच्या निर्णयावरून वाद झाल्यानंतर संतप्त झालेल्या खेळाडून अंपायरवर जीवघेणा हल्ला केला. या हल्ल्यात गंभीर जखमी झालेल्या अंपायरचा जास्त रक्तस्राव होऊन जागीच मृत्यू झाला. विशाखापट्टनममध्ये ही घटना घडली. या घटनेमुळे एकच खळबळ उडाली आहे.

मिळालेल्या माहितीनुसार, विशाखापट्टनममध्ये क्रिकेटच्या स्पर्धेचे आयोजन करण्यात आले होते. या सामन्यादरम्यान रन आऊट देण्यावरून खेळाडूंमध्ये वाद झाला. मैदानावर असलेल्या दोन्ही अंपायरने परिस्थिती शांत करण्याचा प्रयत्न केला. पण हे प्रकरण इतके चिघळले की अंपायरची चाकूने वार करत हत्या करण्यात आली. या सामन्यादरम्यान डोला अजिब बाबू आणि बुदुमुरी चिरंजीवी हे दोघे अंपायर होते.

सामन्यादरम्यान रन आऊटच्या निर्णयानंतर खेळाडू तर चिडलेच पण त्याठिकाणी उपस्थित असलेल्या चाहत्यांनी देखील मैदानात धाव घेतली. दोन्ही अंपायरने परिस्थिती शांत करण्याचा प्रयत्न केला पण एका संप्त प्रेक्षकाने अंपायरला शिवीगाळ करण्यास सुरूवात केली. सर्कल इन्स्पेक्टरने सांगितले की, दोन्ही अंपायरनी हस्तक्षेप करत प्रकरण मिटवण्याचा प्रयत्न केला. कांता किशोर नावाचा एक प्रेक्षक संतप्त झाला आणि त्याने अंपायर डोला अजिब बाबू आणि बुदुमुरी चिरंजीवी या दोघांना आणि खेळाडूंना शिवीगाळ केली.

पोलिसांनी सांगितले की, आरोपी कांता किशोर २६ वर्षीय असून त्याने नंतर प्रकरण मिटवण्यासाठी अंपायरला बाजूला बोलावले. सामना संपल्यानंतर अजित बाबू चिंरजीवी आणि त्यांचे काही मित्र तिथे आले. त्यांच्यात वाद झाला आणि किशोरने अचानक अंपायर बाबूच्या छातीत चाकू खुपसला. त्यामुळे ते जागीच कोसळले. तर दुसरा अंपायर चिरंजीवी यांच्यावर देखील त्याने हल्ला करण्याचा प्रयत्न केला पण ते आपला जीव वाचवत पळून गेले. या हल्ल्यात अंपायर चिरंजीवी जखमी झाले आहेत. पण या घटनेत अंपायर अजित बाबूचा जागीच मृत्यू झाला. आरोपीने दारूच्या नशेत हे कृत्य केले. या प्रकरणी पोलिसांनी गुन्हा दाखल केला आहे. आरोपी फरार असून पोलिस त्याचा शोध घेत आहेत.