हरिद्वारमध्ये वडिलांच्या नात्याला काळिमा फासणारी घटना घडली आहे. ११ वर्षांच्या मुलीवर जन्मदात्या बापाने तिला मारहाण करत तिच्यावर बलात्कार केला. इतकंच नाही तर, नराधम बापाने मुलीला मारून टाकण्याची धमकी देत तिचा मानसिक छळ केला. पीडित मुलीने बापाच्या या हैवानी कृत्याचे चित्रण केले. याप्रकरणी पोलीस ठाण्यात तक्रार दाखल करण्यात आली आहे.

मिळालेल्या माहितीनुसार, सदर घटना हरिद्वारच्या कंखलमध्ये घडली आहे. पीडितेने सांगितले की, ती ८ ते ९ वर्षांची असल्यापासून तिचे वडील तिचं लैंगिक शोषण करत आले आहेत. शिवाय हे कोणाला सांगितल्यास जीवे मारण्याची धमकी सुद्धा देण्यात आली. तिने अनेकदा कुटुंबाला तसेच इतर नातेवाईकांना सांगण्याचा प्रयत्न केला.

ती वारंवार आजारी पडत होती. मात्र कोणीही तिच्यावर विश्वास ठेवला नाही. तिच्या आजारपणाकडे दुर्लक्ष करण्यात आलं. पीडितेने सांगितले की सर्वांना तिच्यावर विश्वास बसत नव्हता. त्यामुळे मुलीने फोनमध्ये वडिलांनी केलेल्या कृत्याचे दृश्य कैद केले. याप्रकरणी पोलिसांत तक्रार दाखल करण्यात आली आहे.

न्यायालयाने या प्रकरणी नराधम बापाला २० वर्षे सक्तमजुरी आणि ३०,००० रुपये दंडाची शिक्षा सुनावली आहे. दंड न भरल्यास अतिरिक्त तीन महिने तुरुंगवास भोगावा लागेल.या घटनेने परिसरात खळबळ उडाली असून मुलीच्या सुरक्षिततेवर गंभीर प्रश्नचिन्ह निर्माण केले जात आहेत.