मागील काही वर्षांपासून युक्रेन आणि रशियामध्ये युद्ध होतंय. या दोन देशातील युद्ध थांबवण्यासाठी अनेक देश प्रयत्न करत आहेत. परंतु हे युद्ध थांबण्याचं नाव घेत नाहीये. रशियाने पुन्हा एकदा युक्रेनची राजधानी कीववर ड्रोन आणि क्षेपणास्त्रांनी हल्ला केलाय. यावेळी रशियाच्या टार्गेटवर युक्रेनचे मंत्री होते. या हल्लात दोन जणांचा मृत्यू झाला आहे. मृतांमध्ये एक वर्षाच्या मुलाचा समावेश आहे.

रशियाने ड्रोन आणि क्षेपणास्त्रांनी कीववर मोठ्या प्रमाणात हल्ला केलाय. या हल्ल्यानंतर कीवमधील कॅबिनेट इमारतीच्या छतावरून धूरही निघताना दिसत. हा धूर हल्ल्यामुळे दिसला की इतर काही कारणाने बाहेर पडत होता हे समोर आलेले नाहीये. मिळालेल्या माहितीनुसार, कीव शहर प्रशासनाचे प्रमुख तैमूर तकाचेन्को यांनी या हल्ल्याबद्दल माहिती दिलीय. मृतांमध्ये एका वर्षाच्या मुलाचाही समावेश आहे.

मुलाचा मृतदेह ढिगाऱ्यातून बाहेर काढण्यात आलंय. कीवचे महापौर विटाली क्लिट्स्को म्हणाले की, रशियाने सोडलेल्या ड्रोनचा ढिगारा स्वियाटोशिंस्की जिल्ह्यातील एका निवासी इमारतीवर आणि कीवच्या डार्नित्सकी जिल्ह्यातील एका इमारतीवर पडला. या हल्ल्यात १० हून अधिक लोक जखमी झालेत. रशियाने सप्टेंबरच्या पहिल्या सहा दिवसांत १३०० हून अधिक ड्रोन हल्ले केलेत, असा आरोप युक्रेनने केला होता. याशिवाय ९०० गाईडेड एरियल बॉम्ब आणि ५० हून अधिक क्षेपणास्त्रे डागण्यात आलीत.

एका पत्रकाराने या हल्ल्याची दाहकता किती होती हे सांगितलंय, असोसिएटेड प्रेसच्या पत्रकारांनी रशियाच्या हल्ल्यानंतर कीवच्या कॅबिनेट इमारतीच्या छतावरून धुराचे लोट उठताना पाहिले. हल्ल्यामुळे इमारतीला आग लागली होती इतर कारणामुळे धुराचे लोट उठले होते, हे अद्याप स्पष्ट झाले नाही. रशियाने आतापर्यंत शहराच्या मध्यभागी असलेल्या सरकारी इमारतींना लक्ष्य करण्यापासून परावृत्त केले आहे.