Raymond Chairman Gautam Singhania Maldives Speedboat Accident रेमंड समूहाचे अध्यक्ष व व्यवस्थापकीय गौतम सिंघानिया यांचा मालदीवमध्ये भीषण अपघात झाला आहे. स्पीडबोट उलटल्याने हा अपघात झाला असून सिंघानिया यांना किरकोळ दुखापत झाली आहे. त्यांच्यावर सध्या मुंबईत उपचार सुरु असल्याची माहिती समोर आली आहे. या स्पीडबोटमध्ये आणखी दोन भारतीय असून ते सध्या बेपत्ता आहेत.

मालदीव मधील स्थानिक वृत्तांच्या माहितीनुसार, पर्यटकांना घेऊन जाणारी एक स्पीडबोट शुक्रवारी पहाटे ‘व्ही फेलिधू’ जवळ उलटली. या स्पीडबोटवर एकूण सात जण होते. त्यात यूके आणि रशियातील दोन महिला तसेच भारतातील पाच पुरुषांचा समावेश होता. या अपघातात पाच जण समुद्रात वाहून गेले, त्यात रशियातील एक महिला आणि भारतातील चार पुरुषांचा समावेश आहे.

या अपघातग्रस्त बोटवर गौतम सिंघानिया हे देखील त्या पर्यटकांमध्ये होते. बोट चालक हरी सिंग यांसह आणखी दोन भारतीय पुरुष बेपत्ता असून शोध मोहीम सुरू आहे. मात्र सिंघानिया यांची सुखरूप सुटका करण्यात आली आहे. त्यांना किरकोळ दुखापत झाली आहे. गौतम सिंघानिया यांना दक्षिण मुंबईतील ब्रीच कँडी रुग्णालयात दाखल करण्यात आले आहे. तसेच योग्य देखरेखीखाली त्यांच्यावर उपचार सुरु आहेत.