• राहुल गांधींचे दिल्लीतील पोलिस ठाण्याबाहेर ठिय्या आंदोलन

• पेलेट गन प्रकरणी राहुल गांधींची एफआयआर दाखल करण्याची मागणी

• विद्यार्थी आंदोलनातील पेलेट गन वापरावरून राहुल गांधी आक्रमक

• डीसीपी कार्यालयाबाहेर राहुल गांधींचे ठिय्या आंदोलन

काँग्रेस नेते राहुल गांधी यांनी विद्यार्थी प्रश्नावरून पुन्हा एकदा आक्रमक झाले आहेत. पेलेट गनचा मुद्दा उपस्थित करत राहुल गांधी यांनी आज दिल्लीतील पार्लमेंट स्ट्रीट पोलिस ठाण्याला भेट दिली आणि डीसीपी कार्यालयासमोर ठिय्या आंदोलन केले. जंतर मंतर येथे कॉक्रोच जनता पार्टीच्या आंदोलनादरम्यान वापरण्यात आलेल्या पेलेट गनबद्दल राहुल गांधी वारंवार प्रश्न उपस्थित करत आहेत. आज या प्रकरणाच्या तपासाची चौकशी करण्यासाठी त्यांनी डीसीपी कार्यालयाला भेट दिली. त्यानंतर एफआयआर दाखल करत नसल्यामुळे ते चांगलेच आक्रमक झाले. त्यांनी डीसीपी कार्यालयाबाहेर ठिय्या आंदोलन सुरू केले.

विद्यार्थी आंदोलनादरम्यान पोलिसांनी पेलेट गनचा वापर केला होता. या पेलेट गनमुळे अनेक विद्यार्थी जखमी झाले होते. या पेलेट गनमुळे जखमी झालेला विद्यार्थी साहिल लोचव याला घेऊन राहुल गांधी हे पोलिस ठाण्यात पोहचले. राहुल गांधी यांनी दिल्ली पोलिसांना या प्रकरणाच्या तपासाच्या प्रगतीबद्दल आणि त्यांनी आतापर्यंत काय कारवाई केली याबद्दल विचारणा केली. जोपर्यंत एफआयआर दाखल होत नाही, तोपर्यंत आपण घटनास्थळावरून जाणार नाही, असे सांगत राहुल गांधी यांनी डीसीपी कार्यालयाबाहेर ठिय्या आंदोलन सुरू केले.

या प्रकरणी एफआयआर दाखल होत नाही तोपर्यंत आपण इथेच थांबणार असल्याचे राहुल गांधी यांनी सांगितले. या प्रकरणाच्या तपासासाठी सुप्रीम कोर्टाने माजी न्यायमूर्ती आर. सुभाष रेड्डी यांच्या अध्यक्षतेखाली ५ सदस्यीय उच्चस्तरीय चौकशी समिती स्थापन करण्यात आली आहे. ही समिती २० जुलै रोजी दिल्लीतील जंतर मंतर आणि देशाच्या इतर भागांमध्ये विद्यार्थी आंदोलकांवर झालेल्या पोलिस अत्याचारांच्या आरोपांची चौकशी करणार आहे. नीट पेपर फुटीसह आणि इतर परीक्षांच्या प्रश्नपत्रिका फुटल्यानंतर विद्यार्थी आक्रमक झाले होते आणि त्यांनी आंदोलन करत तत्कालीन शिक्षणमंत्री धर्मेंद्र प्रधान यांच्या राजीनाम्याची मागणी केली होती.

दरम्यान, २० जुलै रोजी कॉक्रोच जनता पार्टीने दिल्लीतील जंतर मंतर येथे नीट पेपरफुटीच्या विरोधात आंदोलन केले होते. या आंदोलनामध्ये देशभरातील तरुण मोठ्या संख्येने सहभागी झाले होते. दिल्ली पोलिसांनी आंदोलकांना पांगवण्यासाठी पेलेट गनचा वापर केला होता. यामध्ये अनेक विद्यार्थी जखमी झाले होते. त्यांच्यावर अद्याप रुग्णालयात उपचार सुरू आहे. विद्यार्थ्यांवर पेलेट गनच्या वापराबाबत विरोधी पक्ष आक्रमक झाला असून ते अजूनही प्रश्न उपस्थित करत आहे.