Silver Jubilee Ceremony In Hyderabad

हैदराबादमधील (Hyderabad) रामोजी फिल्म सिटी येथे एका खासगी कंपनीच्या रौप्यमहोत्सवी सोहळ्यादरम्यान एक अपघात झालाय. या अपघातात एका खासगी कंपनीच्या सीईओला आपला जीव गमवावा लागला, तर दुसरा अधिकारी गंभीर जखमी झाला.

गुरुवारी सायंकाळी हा रौप्य महोत्सवी समारंभ सुरू होता. तेव्हा कंपनीचे सीईओ संजय शहा आणि त्यांचे सहकारी राजू हे लोखंडी पिंजऱ्यातून स्टेजवर प्रवेश करत होते. त्यानंतर पिंजऱ्याला आधार देणारी लोखंडी साखळी एका बाजूने तुटली, आणि त्या पिंजऱ्यात बसलेले सीईओ आणि त्यांचे सहकारी खाली पडले, अशी माहिती पोलिसांनी दिलीय. पिंजरा उंचावरून स्टेजवर खाली येत होता.

संजय शहा आणि त्यांच्या सहकाऱ्याला तातडीने रुग्णालयात नेण्यात आले. मात्र उपचारादरम्यान शहा यांचा मृत्यू झालाय. त्यांच्या सहकाऱ्याची प्रकृती चिंताजनक आहे. पोलिसांनी सांगितले की, कंपनीच्या अधिकाऱ्याच्या तक्रारीच्या आधारे इव्हेंट मॅनेजमेंट कंपनीच्या अधिकाऱ्यांविरुद्ध गुन्हा दाखल करण्यात आला (Hyderabad) आहे.

संजय शाह (56) हे Vistex Asia Pacific Private Limited कंपनीचे CEO होते. ही अमेरिकेतील बहुराष्ट्रीय सॉफ्टवेअर कंपनी आहे. अपघातात जखमी झालेले शाह यांचे सहकारी कंपनीचे अध्यक्ष आहेत.

सीईओ शहा यांचा उपचारादरम्यान मृत्यू

अपघाताबाबत माहिती देताना अब्दुल्लापूरमेट पोलीस स्टेशनचे उपनिरीक्षक डी करुणाकर रेड्डी म्हणाले की, कार्यक्रमादरम्यान मोठ्या आवाजात गाणे वाजत होते. खाली येताना शहा आणि राजू पिंजऱ्यातून उत्साहात एन्ट्री घेत होते. यावेळी पिंजऱ्याला जोडलेल्या दोन तारांपैकी एक तार तुटली. दोघेही 15 फुटांपेक्षा जास्त उंचीवर होते. पिंजऱ्याच्या तारा तुटल्यानंतर दोघेही काँक्रीटच्या स्टेजवर पडले. यात दोघेही गंभीर जखमी झाले. त्यांना तातडीने स्थानिक रुग्णालयात नेण्यात आलं. त्यानंतर त्यांची प्रकृती अधिकच बिघडल्याने त्यांना खासगी रुग्णालयात दाखल करण्यात आलं तेथे कंपनीचे सीईओ संजय शहा यांचा उपचारादरम्यान मृत्यू झाला.

IPC कलम 304A अंतर्गत इव्हेंट मॅनेजमेंट कंपनीच्या विरोधात गुन्हा दाखल केलाय. RFC व्यवस्थापन, त्याचे वरिष्ठ इव्हेंट मॅनेजर, मुख्य व्यवस्थापक (सुरक्षा), स्पेशल इफेक्ट कॉन्ट्रॅक्टर आणि केज ऑपरेटर यांच्या विरोधात एफआयआर नोंदवण्यात आलाय.