नवी दिल्ली : सोशल मीडिया अकाउंटवर तयार केलेल्या बनावट खात्यांमधून ऑनलाइन माध्यमातून शंभरहून अधिक महिलांना त्रास देणाऱ्या एका जीम ट्रेनरला दिल्ली पोलिसांनी अटक केली आहे. विकास कुमार असे या आरोपीचे नाव आहे. विकास कुमारने सोशल मीडियावर मुलींच्या नावे बनावट अकाउंट तयार केले होते. या बनावट अकाऊंटच्या माध्यमातून तो महिला आणि मुलींशी मैत्री करून त्यांना अश्लील व्हिडिओ आणि मेसेज पाठवायचा. अशी माहिती समोर आली आहे.

याबाबत अप्पर पोलिस अधीक्षक अमित गोयल यांनी माहिती दिली. सागरपूर पोलिस ठाणे परिसरातील एका महिलेने आपल्या फेसबुक मेसेंजरवर शीतल ठाकूर नावाच्या प्रोफाइलवरून अश्लील व्हिडिओ आणि मेसेज येत असल्याची तक्रार केली होती. फेसबुकवर शीतल ठाकूर नावाच्या व्यक्तीने जेव्हा तक्रारदार महिलेला अश्लील मेसेज आणि व्हिडीओ पाठवले तेव्हा त्या महिलेने त्यावर आक्षेप घेतला. त्यानंतर बनावट अकाऊंट तयार केलेल्या विकास कुमारने आपण तिला वैयक्तिकरित्या ओळखत असल्याचे सांगितले.

तक्रारदार महिलेच्या तक्रारीचे गांभीर्य लक्षात घेता दक्षिण पश्चिम जिल्ह्यातील सायबर सेलचे निरीक्षक रमण कुमार सिंह आणि सागरपूर पोलिस ठाण्याच्या पथकाने या प्रकरणाचा तपास सुरू केला आणि शीतल ठाकूर यांच्या नावाने तयार केलेल्या प्रोफाइलविषयी फेसबुकवर माहिती गोळा करण्यास सुरवात केली. तपासात पोलिस पथकाला रियाझुद्दीनच्या नावाने जारी केलेला मोबाइल नंबर सापडला. त्याच नंबरवरुन आणखी दोन प्रोफाइल चालू होती. हा नंबर बनावट ओळखपत्राच्या मदतीने खरेदी केल्याचे तपासात समोर आले.

त्यानंतर पोलिसांनी सापळा रचून शिताफीने विकासला अटक केली. विकास मूळचा मेरठ, उत्तर प्रदेशचा रहिवासी आहे. पण तो लहानपणापासूनच त्याच्या आई वडिलांसोबत दिल्लीत राहत होता. तो द्वारका येथील जिम ट्रेनर आहे आणि त्याला अश्लील व्हीडिओज पाहण्याची सवय आहे. या व्यसनामुळे त्याने बनावट प्रोफाइल बनवून मुलींशी मैत्री केली, असेही त्याने सांगितले. आरोपी विकास मुलीशी जवळीकता वाढवण्यासाठी त्यांना अश्लील व्हिडिओ आणि मेसेज पाठवत असे. इतकेच नव्हे तर त्याने पूजा कुमारी आणि शिवानी गुप्ता यांच्या नावावर बनावट प्रोफाइल बनवून त्याने दोन हजाराहून अधिक महिलाना अश्लील व्हिडिओ आणि मेसेज पाठवून त्रास दिल्याचेही तपासात समोर आले आहे.

Edited By- Anuradha Dhawade