पाकिस्तानी तालिबानच्या अतिरेक्यांनी खैबर पख्तूनख्वा प्रांतातील डेरा इस्माइल खान जिल्ह्यात एक मोठा हल्ला केला आहे. अतिरेक्यांनी पाकिस्तानमधील एका पोलीस प्रशिक्षण केंद्रावर हल्ला केला. या भीषण हल्ल्यात सात पोलीस ठार झाले. तर, सुरक्षा दलांनी पाच हल्लेखोरांना ठार मारले. हा हल्ला पाकिस्तानच्या अंतर्गत सुरक्षेला मोठा धक्का मानला जात आहे.

शुक्रवारी रात्री ९ वाजण्याच्या सुमारास, रत्ता कुलाची परिसरातील पोलीस प्रशिक्षण केंद्राच्या मुख्य प्रवेशद्वाराजवळ स्फोटकांनी भरलेला एक ट्रक आदळला. यामुळे स्फोट झाला. या स्फोटामुळे केंद्राच्या भिंतीचा काही भाग कोसळला. त्यात एक पोलीस कर्मचारी जागीच ठार झाला.

त्यानंतर सात ते आठ दहशतवादी पोलीस प्रशिक्षण केंद्रात घुसले. त्यांनी अंदाधुंद गोळीबार केला. हल्लेखोरांनी यावेळेस ग्रेनेड आणि इतर शस्त्रांचाही वापर केला. यावेळी २०० हून अधिक पोलीस कर्मचाऱ्यांना सुरक्षितपणे बाहेर काढण्यात आले. या हल्ल्यात १३ पोलीस कर्मचारी गंभीर जखमी झाले असल्याची माहिती आहे. त्यांना तातडीने रूग्णालयात उपचारासाठी दाखल करण्यात आले. मृतांमध्ये एक अधिकारी आणि इतर कॉन्स्टेबलचा समावेश आहे.

सुरूवातीला टीटीपीने हल्ल्याची जबाबदारी स्वीकारली होती. परंतू, नंतर त्यांनी नाकारली. काही सोशल मीडिया अकांऊट्सने आयएमपीच्या नावाने जबाबदारी स्वीकारली होती. मात्र, हा हल्ला नेमका कुणी घडवून आणला, हे अद्याप अस्पष्ट आहे. हल्लेखोरांनी बॉडी कॅमेऱ्यांचा वापर करून हल्ल्याचे लाईव्ह स्ट्रीमिंग केले होते. याचे व्हिडिओही समोर आले आहेत.