दिल्ली येथे झालेल्या एनडीए संसदीय पक्षाच्या बैठकीमध्ये पंतप्रधान नरेंद्र मोदी यांचा सत्कार करण्यात आला. ऑपरेशन सिंदूर आणि ऑपरेशन महादेवच्या यशानंतर पीएम मोदी यांचे सर्वांनी अभिनंदन करत सत्कार केला. यावेळी 'भारत माता की जय', 'हर हर महादेव'चा जयघोष आणि टाळ्यांच्या कडकडाटामध्ये पीएम मोदींचे स्वागत करण्यात आले. याचा व्हिडीओ समोर आला आहे.

जून २०२४ मध्ये मोदी सरकार स्थापन झाल्यानंतर संसदेच्या अधिवशेनादरम्यान भाजपच्या नेतृत्वाखालील सत्ताधारी आघाडीच्या खासदारांची ही दुसरी बैठक झाली. हर हर महादेव आणि भारत माता की जयच्या घोषणा देत भाजप आणि त्यांच्या मित्र पक्षांच्या वरिष्ठ नेत्यांनी पीएम मोदींचे स्वागत केले. यावेळी ऑपरेशन सिंदूर आणि ऑपरेशन महादेवच्या यशाबाबत पीएम मोदींचे कौतुक करण्यात आले. यावेळी आनंदाचे वातावरण होते. यावेळी राजनाथ सिंह यांनी पीएम मोदींच्या गळ्यामध्ये पुष्पहार घातला. त्यानंतर पीएम मोदींनी सर्वांचे आभार मानले.

२२ एप्रिल रोजी जम्मू-काश्मीरच्या पहलगाम येथे भ्याड दहशतवादी हल्ला झाला. या हल्ल्यामध्ये २७ निष्पाप नागरिकांचा बळी गेला होता. या हल्ल्यानंतर भारताने ऑपरेशन सिंदूर अंतर्गत पाकव्याप्त काश्मीर आणि पाकिस्तानमधील ९ दहशतवादी उड्डे उद्ध्वस्त केले होते. या हल्ल्याचे भारताने जशाच तसं उत्तर दिलं. भारतीय हवाई दलाने पाकिस्तानचे अनेक हवाई तळ उद्ध्वस्त केले. भारताच्या लष्करी सामर्थ्यापुढे पाकिस्तानला गुडघे टेकावे लागले. त्यानंतर भारताने ऑपरेशन महादेवद्वारे अनेक दहशतवाद्यांचा खात्मा केला.

संसदेच्या पावसासाळी अधिवेशनादरम्यान एनडीएची ही महत्वाची बैठक पार पडली. या अधिवेशनामध्ये विरोधकांनी सरकारला विविध मुद्द्यांवरून घेरलं आहे. निवडणूक आयोगाच्या कथित पक्षपाती वर्तन, पहलगाम दहशतवादी हल्ला आणि ऑपरेशन सिंदूर यावरून विरोधी पक्ष सरकारवर जोरदार टीका करत आहे. यावरून विरोधक अधिवेशनादरम्यान सुरू असलेल्या चर्चेत गोंधळ घातलाना दिसत आहे त्यामुळे संसदेचे कामकाज ठप्प केले जात आहे.