ओडिशाचे मुख्यमंत्री मोहन चरण माझी यांचा आक्षेपार्ह आणि मॉर्फ व्हिडिओ सोशल मीडियावर व्हायरल केल्याप्रकरणी पोलिसांनी एक तरुणाला अटक केली आहे. गुन्हे शाखेकडून देण्यात आलेल्या माहितीनुसार, एका नागरिकाने या व्हिडिओबाबत तक्रार दाखल केली होती. तक्रारदाराच्या म्हणण्यानुसार, मुख्यमंत्री माझी यांची प्रतिमा मलिन करण्यासाठी आणि त्यांची बदनामी करण्याच्या उद्देशाने हा व्हिडिओ जाणूनबुजून तयार करण्यात आला होता.

किशोर कौशल्य असे आरोपीचे नाव आहे. त्याला रायगडा जिल्ह्यातून अटक केली आहे. गुन्हे शाखेच्या दिलेल्या माहितीनुसार, आरोपीने आधी मुख्यमंत्री मोहन चरण माझी यांचा मॉर्फ केलेला व्हिडिओ तयार केला. खरा वाटावा म्हणून त्याने एआयचा वापर केला. नंतर अश्लील व्हिडिओ व्हायरल केला. ओडिशामधील एका नागरिकाने यासंदर्भात पोलीस ठाण्यात तक्रार दाखल केली.

तक्रार मिळताच सायबर क्राइम युनिटने जलद तपास सुरू केला. सुरूवातीला फेसबुक मेटाशी संपर्क साधण्यात आला. तसेच व्हिडिओ काढून टाकण्यास सांगितलं. यानंतर फेसबुकने तात्काळ आक्षेपार्ह व्हिडिओ आणि फोटो काढून टाकला.

तपासादरम्यान, आरोपीचं नाव किशोर कौशल्य असल्याचं समोर आलं. तो रायगडा जिल्ह्यातील चांडाली पोलीस स्टेशन परिसरातील केउतागुडा स्टेशन साही येथील रहिवासी असल्याची माहिती समोर आली. तो एका खासगी कंस्ट्रक्शन कंपनीत काम करत असल्याची माहिती समोर आली आहे.

किशोरने आधी आक्षेपार्ह व्हिडिओ तयार केला. नंतर फेसबुकवर शेअर केला. हा व्हिडिओ खरा वाटावा यासाठी त्याने एआयचा वापर केला. आरोपीची ओळख पटल्यानंतर त्याला अनेक गंभीर कलमांखाली अटक करण्यात आली आहे. त्याला आज भुवनेश्वर येथील एसडीजेएम न्यायालयात हजर करण्यात आले आहे.