ओडिशामधून मोठी बातमी समोर आली आहे. शुक्रवारी रात्री ४० भाविकांना घेऊन जाणाऱ्या एका बसचा भीषण अपघात झाला. या अपघातात पाच जणांचा मृत्यू झाला असून ३५ जण गंभीर जखमी झाले आहेत. जखमींना जवळच्या रुग्णालयात उपचारासाठी पाठवण्यात आले आहे. या दुर्घटनेचा आकडा वाढण्याची शक्यता आहे.

मिळालेल्या माहितीनुसार, ओडिशाच्या नयागढ जिल्ह्यात दशपल्ला पोलीस ठाण्याच्या हद्दीतील टेकराघाटजवळ सदर बसचा अपघात घडला. या बसमधून ४० भाविक प्रवास करत होते. ही खासगी बस बेरहामपूरहून हरी शंकर येथे भाविकांना घेऊन जात होती. टेकराघाटजवळ ही बस अनियंत्रित होऊन एका मोठ्या खडकाळ आदळून उलटली.

हा अपघात इतका भीषण होता की, गाढ झोपेत असलेले भाविक बस बाहेर फेकले गेले. या दुर्घटनेत आतापर्यंत ५ जणांचा मृत्यू झाला असून ३५ प्रवासी जखमी झाले आहेत. जखमींना जवळच्या रुग्णालयात उपचारासाठी दाखल करण्यात आले आहे. या अपघाताची माहिती मिळताच स्थानिक पोलीस घटनास्थळी दाखल झाले.

बचाव पथके, अग्निशमन दलाचे जवान यांच्या मदतीने घटनास्थळी रेस्क्यू ऑपरेशन सुरु आहे. बचाव पथकाने बसच्या ढिगाऱ्याखाली अडकलेल्यांना बाहेर काढले. दरम्यान या प्रकरणी पोलीस तपास करत आहेत. दरम्यान मृत प्रवाशांच्या कुटुंबियांवर दुःखाचा डोंगर कोसळला आहे.