म्यानमारमध्ये झालेल्या भुकंपातील मृतांचा आकडा आता सुन्न करणारा आहे. येथील मृतांचा आकडा तब्बल २ हजार ५६ वर पोहोचला आहे. तर ३ हजारांपेक्षा अधिक नागरिक जखमी झाले आहेत आणि सुमारे २७० लोक अजूनही बेपत्ता असल्याची माहिती समोर आली आहे. म्यानमारमधील सत्ताधारी जुंटा सरकारने आज सोमवारी अधिकृतपणे ही माहिती दिली आहे. भुकंप इतका भीषण होता की, सारंच उद्ध्वस्त झालं आहे.

म्यानमारमध्ये ७.७ रिश्टर सेलच्या विनाशकारी भुकंपामुळे ढिगाऱ्याखाली अनेक नागरिक दबले गेले. त्यांचे बचावकार्य सध्या सुरु आहे. या प्रलयात मृत पावलेल्या लोकांना श्रद्धांजली अर्पण करण्यासाठी सध्या एक आठवड्याचा राष्ट्रीय दुखवटा जाहीर केला आहे. तर येथील नागरिक या हादऱ्यातून अद्याप सावरलेले नाहीत. तिथल्या अधिकाऱ्यांनी सांगितले की, मंडाले येथील ग्रेट वॉल हॉटेलच्या ढिगाऱ्याखालून एका महिलेला सुरक्षितपणे बाहेर काढण्यात आले. तीन दिवसांनंतर कोणीतरी व्यक्ती जिवंत सापडल्याने लोक वाचण्याची आशा निर्माण झाली आहे. म्यानमारमधील चिनी दुतावासाने त्या महिलेची प्रकृती स्थिर असल्याचे फेसबुक पोस्टच्या माध्यमातून सांगितलं आहे.

म्यानमारमधील भूकंपाच्या केंद्राजवळ असणाऱ्या मंडाले येथे हा भूकंप झाला, ज्याचे धक्के थायलंडसह शेजारील इतर देशालाही बसले आहेत. परिणामी राजधानी बँकॉकसह अनेक भागात नुकसान झाले असल्याचं बातमी आता समोर आली आहे. बँकॉकमध्ये बांधकाम सुरु असलेली गगनचुंबी इमारत जमीनदोस्त झाली. यामध्ये ढिगाऱ्याखाली अडकलेल्या ७६ लोकांना वाचवण्यासाठी बचाव पथकांनी शर्थीचे प्रयत्न केले. भूकंपाच्या धक्क्यामुळे या इमारतीची रचना कोसळली. दुसरीकडे काल रविवारपर्यंत थायलंडमध्ये मृतांची संख्या १८ होती जी आणखी वाढण्याची भीती आहे.