Uttar Pradesh:

उत्तर प्रदेशमधून एक धक्कादायक बातमी समोर आली आहे. एका सासूने आपल्या सुनेची सुपारी देत गोळ्या झाडून तिची हत्या केली आहे. या घटनेमुळे परिसरात एकच खळबळ उडालीये. पोलिसांनी सासूला ताब्यात घेतलंय. (Latest Marathi News)

मिळालेल्या अधिक माहितीनुसार, उत्तर प्रदेशमधील नोएडा येथे ही घटना घडली आहे. पोलिसांना महिलेच्या हत्येची माहिती मिळाल्यानंतर तपास सुरू केला. तपासात सासूला अटक केल्यानंतर तिने स्वत: आपण केलेल्या गुन्ह्याची कबुली दिली आहे.

मिळालेल्या अधिक माहितीनुसार, 5 सप्टेंबर रोजी ही घटना घडली आहे. दुपारच्या सुमारास पती घरी नसताना दुचाकीवरुन काही जण महिलेच्या घरात घुसले. घरात आल्याबरोबर त्यांनी तिच्यावर गोळ्या झाड्यात तिची हत्या केली. गोळ्या झाडून त्यांनी तातडीने तेथून पळ काढला.

यावेळी महिला तेथेच पडून होती. रक्ताच्या थारोळ्यात पडलेली असतानाच तिचा मृत्यू झाला. पोलिसांना याची माहिती मिळाल्यावर त्यांनी तातडीने घटनास्थळी धाव घेतली. चौकशी दरम्यान, त्यांनी हल्लेखोरांना अटक केली.

हल्लेखोरांना अटक केल्यावर सासूचे नाव समोर आले. पोलिसांनी दिलेल्या माहितीनुसार, महिलेचे या आधी एका व्यक्तीसोबत लग्न झाले होते. हा तिचा दुसरा विवाह होता. याबाबत तिने आपल्या दुसऱ्या पतीला काहीच माहिती दिली नव्हती. तसेच मुलगा त्याचा सर्व पगार पत्नीवर खर्च करत होता. याचा सासूला राग येत होता. शेवटी सुपारी देऊन सूनेची हत्या करण्याचा निर्णय सासूने घेतला.