Mother Dairy Increases Milk Rates: सामान्यांच्या खिशाला कात्री बसणार आहे. कारण मदर डेअरी कंपनीचं दूध २ रूपयांनी महागलं आहे. मदर डेअरीच्या कंपनीनं दुधाच्या दरात प्रतिलिटर २ रूपयांनी वाढ करण्याचा निर्णय घेतला. कंपनीनं घेतलेला निर्णय ३० एप्रिल २०२५ पासून अंमलात आणण्यात येणार असून, आजपासून नवे दर लागू होणार आहे. दूध खरेदीचा खर्च वाढल्यानं हे पाऊल उचलावे लागत असल्याचं कंपनीचं म्हणणं आहे.

कंपनीकडून देण्यात आलेल्या माहितीनुसार, उन्हाळ्याच्या तीव्रतेमुळे दूध उत्पादनावर परिणाम झाला असून, त्यामुळे शेतकऱ्यांकडून दूध खरेदीचे दर वाढले आहेत. गेल्या काही महिन्यांमध्ये दूध खरेदीचा खर्च प्रतिलिटर ४ ते ५ रूपयांनी वाढल्यानं ही दरवाढ केल्याचं मदर डेअरीनं स्पष्ट केलं.

दूध दरवाढीचा फटका दिल्ली, उत्तर प्रदेश, हरयाणा आणि उत्तराखंड या राज्यांना बसणार असून, ही दरवाढ बुधवार, ३० एप्रिल २०२५ पासून लागू होणार असल्याचं कपंनीनं स्पष्ट केलं आहे. यासंदर्भात कंपनीच्या प्रवक्त्याने सांगितलं की, 'शेतकऱ्यांना योग्य मोबदला मिळावा आणि ग्राहकांना चांगल्या दर्जाचं दूध मिळावं, यासाठी आम्ही कटिबद्ध आहोत. नव्या दरवाढीमुळे वाढलेल्या खर्चाचा केवळ अर्धा भाग ग्राहकांवर टाकण्यात आला आहे.'

दुधात करण्यात आलेल्या दरवाढीचा फटका दिल्लीत आणि शेजारच्या राज्यांतील लाखो ग्राहकांना बसणार आहे. यामुळे सामान्य ग्राहकांच्या खिशावर पुन्हा एकदा महागाईचा तडाखा बसण्याची शक्यता आहे.