Mexico Supermarket Fire: मेक्सिकोमधील सोनारामध्ये सणाचा उत्सव क्षणात दु:खात बदलला. सुपरमार्केटमध्ये लागलेल्या आगीमध्ये २३ जणांचा होरपळून मृत्यू झाला आहे. यामध्ये अनेक चिमुकल्यांचा समावेश आहे. या दुर्घटनेत २० जण जखमी असल्याची माहितीही समोर आली आहे. ही घटना डे ऑफ द डे उत्सवावेळी घडली आहे. राष्ट्रपती शीबबाम यांनी या दुर्दैवी घटनेबाबत दुख व्यक्त केले आहे.

उत्सवामुळे सुपरमार्केटमध्ये मोठ्या प्रमाणात डिस्काऊंट देण्यात आला होता. विकेंड असल्यामुळे खरेदीसाठी अनेकजण या सुपरमार्केटमध्ये आले होते. त्याचवेळी अचानक आग लागल्याची घटना घडली अन् क्षणात होत्याचे नव्हते झाले. आगीने रौद्ररूप धारण केले. आगीची माहिती मिळताच स्थानिक अग्निशमन दलाच्या गाड्या आणि पोलिसांनी घटनास्थळी धाव घेतली. सध्या आगीवर नियंत्रण मिळवण्याचे काम सुरू आहे.

या अग्नितांडवात आतापर्यंत २३ जणांचा मृत्यू झाला आहे, तर २० पेक्षा जास्त जणांना दुखापत झाली आहे. यामधील काही जणांची प्रकृती अतिशय गंभीर असल्याचे सांगण्यात येत आहे. त्यामुळे मृताची संख्या आणखी वाढू शकते. जखमींवर जवळच्या रूग्णालयात उपचार करण्यात येत असल्याची माहिती स्थानिक प्रसारमाध्यमांनी दिली आहे. सुपरमार्केटमध्ये नेमकी आग कशामुळे लागली? याचा तपास करण्यात येत आहे. आगीचे कारण अद्याप अस्पष्ट आहे. पोलीस आणि अग्निशमन दलाकडून आगीच्या कारणाचा शोध घेतला जात आहे.

स्थानिक माध्यमांच्या वृत्तानुसार, स्फोट किंवा आगीचे कारण विजेचा बिघाड असल्याचे सांगितले जात आहे. अग्निशमन प्रमुखांनी सांगितले की स्फोट झाला की नाही हे निश्चित करण्यासाठी अद्याप चौकशी सुरू आहे. हर्मोसिलो नगरपालिकेकडून हा दहशतवादी हल्ला नसून दुर्घटना असल्याचे सांगितलेय.दरम्यान, राज्यपालाकडून या दुर्घटेनची चौकशी करण्याचे आदेश दिले आहेत.

मेक्सिकन राष्ट्राध्यक्ष क्लॉडिया शेनबॉम यांनी X वर पोस्ट करत या दुर्घटेनाबाबत दु:ख व्यक्त केलेय. त्यांनी आपल्या पोस्टमध्ये म्हटले की, "या भयानक अपघातात जवळच्या व्यक्तींना गमावलेल्या सर्व कुटुंबांसोबत माझ्या संवेदना आहेत. सरकारी मदत पथके घटनास्थळी पोहोचली आहेत." दरम्यान, सुपरमार्केटमध्ये लागलेल्या आगीवर नियंत्रण मिळवण्यासाठी आणि बचाव कार्यासाठी ४० टीम सदस्य आणि १० रुग्णवाहिका सहभागी होत्या.सध्या आगीवर नियंत्रण मिळवणयात आले असून कुलिंगचे काम सुरू आहे. बचाव पथकाकडून ढिगाऱ्यात अडकलेल्यांचा शोध अजूनही सुरू आहे.