युनायटेड किंगडमची राजधानी लंडनमध्ये स्थलांतराच्या विरोधात प्रचंड रॅली काढण्यात आली. या रॅलीत अंदाजे दीड लाख लोक सहभागी झाले होते. टॉमी रॉबिन्सन यांनी “युनायटेड द किंगडम” या नावाने ही रॅली आयोजित केली होती. मात्र, रॅलीदरम्यान अनेक ठिकाणी हिंसाचार भडकला. यात २६ पोलीस अधिकारी जखमी झाले असून, त्यापैकी चार जण गंभीर जखमी झाले आहेत.

पोलिसांनी दिलेल्या माहितीनुसार, बरेच लोक शांततेत निषेध करण्यासाठी आले होते. परंतु असेही काही लोक होते, ज्यांचे उद्दीष्ट हिंसाचार पसरवणे होते. पोलिसांनी आतापर्यंत या प्रकरणात २५ जणांना ताब्यात घेतलं आहे. आणखी लोकांची ओळख पटवली जात आहे, ज्यांच्यावर कठोर कारवाई केली जाईल.

या रॅलीमध्ये लाखो संख्येनं लोक सहभागी झाले होते. यात आंदोलकांनी युनियन जॅक आणि इंग्लंडचा ध्वज, तसेच अमेरिका आणि इस्त्रायलचे ध्वज रॅलीमध्ये आणले होते. तर, काही लोक अमेरिकेचे अध्यक्ष डोनाल्ड ट्रम्प यांनी MAGA टोपी घालून आले होते. निदर्शकांनी पंतप्रधानांवर टीका केली आणि स्थलांतरितांना घरी पाठवा, अशा घोषणा दिल्या.

रॅलीचा नेता टॉमी रॉबिन्सन नक्की कोण?

टॉमी रॉबिन्सन यांचे खरे नाव स्टीफन याक्सली लेनन आहे. ते इंग्लिश डिफेन्स लीगचे संस्थापक आहेत. ते ब्रिटनमधील उजव्या विजारसरणीच्या व्यक्तींपैकी एक आहे. त्यांनी सांगितले की, ही एका सांस्कृतिक क्रांतीची सुरूवात आहे.

यावेळी एलोन मस्क यांनी रॅलीमध्ये व्हिडिओद्वारे भाषण दिले. मस्क म्हणाले, ब्रिटमनमधील अनियंत्रित स्थलांतर देशाच्या अस्मितेला धोका निर्माण करत आहे. आता सरकार बदलण्याची गरज आहे, असं ते म्हणाले.

नेपाळ आणि फ्रान्समध्ये राजकीय गोंधळ

नेपाळ आणि फ्रान्समध्ये अलिकडेच मोठ्या प्रमाणात राजकीय आणि सामाजिक उलथापालथ झाली. नेपाळमध्ये, बरोजगारी, भ्रष्टाचार आणि राजेशाही परत आणण्याच्या मागणीसाठी तरूण निदर्शक रस्त्यावर उतरले. तर, फ्रान्समध्ये आक्षेपार्ह कायदे आणि आर्थिक धोरणांविरूद्ध मोठ्या प्रमाणात निदर्शने आणि रस्त्यावरील हिंसाचार झाल्याची माहिती आहे.