Maoist Blast In Chhattisgarh

छत्तीसगडमधील नारायणपूर जिल्ह्यात माओवाद्यांनी घडवून आणलेल्या स्फोटात छत्तीसगड सशस्त्र दलाचा (सीएएफ) एक जवान शहीद झाला आहे. तर एक जवान जखमी झाला असून बुधवारी सकाळी ११ च्या सुमारास आमदाईघाटी लोहखनिज खाण परिसरात हा स्फोट घडवून आणला आहे.

आमदाईघाटी लोहखनिज खाण परिसरात सीएएफचे जवान गस्त घालत असताना माओवाद्यांकडून बेछूट गोळीबार करण्यात आला. सीएएफच्या जवानांनीही चोख प्रत्युत्तर दिले. बराचवेळ माओवादी आणि जवानांमध्ये चकमक सुरू होती. यादरम्यान माओवाद्यांनी आईडीचा स्फोट घडवून आणला. यात एक जवान शहीद झाला आहे तर एक जखमी झाल्याची माहिती वरिष्ठ पोलीस अधिकाऱ्यांनी दिली.

सीएएफ ९ व्या बटालियनचे कॉन्स्टेबल कमलेश साहू या हल्ल्यात शहीद झाले आहेत तर व विनय कुमार जखमी झाले आहेत. कमलेश साहू मूळचे छत्तीसगडचेच असून जंजगीर- चंपा चिल्ह्याचे सुपुत्र आहेत. दरम्यान जखमी विनय कुमार यांना उपचारासाठी स्थानिक रुग्णालयात हलवण्यात आले आहेत.

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

छत्तीसगडमधील नारायणपूर जिल्ह्यात या हल्ल्यानंतर इंडो तिबेट बॉर्डर पोलीस आणि जिल्हा राखीव दलाच्या संयुक्त पथकाकरून परिसररात शोधमोहीम सुरू केली आहे. या वर्षाच्या सुरुवातीलाच छत्तीसगडच्या दंतेवाडा जिल्ह्यात माओवाद्यांनी असाच आत्मघातकी स्फोट घडवून आणला होता. यात ११ सुरक्षा कर्मचारी शहीद झाले होते.