Delhi AAP News : आम आदमी पक्षाला दिल्लीत सर्वात मोठा धक्का बसला आहे. दिल्लीतील पक्षाचे उपाध्यक्ष राजेश गुप्ता यांनी भाजपमध्ये प्रवेश केला आहे. दिल्लीत भाजपचे प्रदेशाध्यक्ष वीरेंद्र सचदेवा यांच्या उपस्थितीत 'आप'च्या राजेश गुप्ता यांनी भाजपमध्ये प्रवेश केला. भाजपमध्ये प्रवेश करताच राजेश गुप्ता यांनी अरविंद केजरीवाल आणि सौरभ भारद्वाज यांच्यावर गंभीर आरोप केले आहेत.

राजेश गुप्ता यांच्याकडे पक्षाच्या उपाध्यक्षपदासहित राष्ट्रीय प्रवक्तेपद देखील त्यांच्याकडे होतं. तसेच ते कर्नाटकात आम आदमी पक्षाचे प्रभारी देखील होते. भाजपमध्ये प्रवेश करताच राजेश गुप्ता यांनी आम आदमी पक्षावर जोरदार निशाणा साधला. आम आदमी पार्टी आता भ्रष्ट झाली आहे. ते मूळ विचारधारेपासून भरकटले आहेत. त्यामुळे पक्षाची प्रतिमा मलीन झाली आहे, असं म्हणत त्यांनी निशाणा साधला आहे.

राजेश गुप्ता यांनी माध्यमांशी संवाद साधताना आम आदमी पक्षाचे संयोजक अरविंद केजरीवाल यांच्यावर गंभीर आरोप केले. अरविंद केजरीवाल आता फोन देखील उचलत नाहीत. त्यांच्याशी संपर्क देखील साधून दिला जात नाही. पक्षाचे प्रदेशाध्यक्ष सौरभ भारद्वाज देखील संवाद साधत नाहीत. या दोघांनी १० वर्षांच्या मेहनतीवर पाणी फेरलं आहे,असा आरोप त्यांनी केला.suggest

तत्पूर्वी, यंदा आम आदमी पक्ष हा दिल्ली विधानसभा निवडणुकीत पराभूत झाला. तर २०२० साली विधानसभा निवडणुकीत आम आदमी पक्षाने ६२ जागा जिंकून सरकार स्थापन केलं होतं. यंदा पक्षाला २२ जागा मिळाल्या आहेत. यंदा भाजपने ४८ जागा जिंकल्या आहेत. निवडणुकीत पराभव झाल्यानंतर दिल्लीत आम आदमी पक्षाच्या प्रतिमेलाही धक्का बसला आहे.