प्रमोद जगताप

नवी दिल्ली : महाराष्ट्राच्या राजकारणाला कलाटणी देणाऱ्या दोन याचिकांवरील सुनावण्या सुप्रीम कोर्टात प्रलंबित आहे. या दोन्ही याचिकांवरील उद्या होणाऱ्या सुनावण्या लांबणीवर गेल्या आहेत. यामुळे ठाकरे गटाला या याचिकेवरील सुनावण्यांसाठी प्रतीक्षा करावी लागणार आहे. (Latest Marathi News)

मिळालेल्या माहितीनुसार, ठाकरे गटाने केंद्रीय निवडणूक आयोगाविरोधात ठाकरे गटाने सुप्रीम कोर्टात दाखल केलेल्या याचिकांवर उद्याही सुनावणी होणार नाही. त्याचबरोबर ठाकरे गटाने दाखल केलेल्या १६ आमदारांच्या अपात्रता प्रकरणाची सुनावणीही लांबणीवर गेली आहे. सुप्रीम कोर्टात उद्या 31 जुलैला सुनावणी होणार होती. मात्र सुप्रीम कोर्टाच्या यादीत हे प्रकरण नाही. त्यामुळे या दोन्ही याचिकांवरील सुनावण्या लांबणीवर गेल्या आहेत.

सुनील प्रभू यांनी दाखल केली होती याचिका

दरम्यान, ठाकरे गटाने दाखल केलेली 16 आमदारांच्या अपात्रता प्रकरणाची सुनावणी लांबणीवर गेली आहे. सुप्रीम कोर्टाने दोन आठवड्यात उत्तर सादर करण्याचे निर्देश विधानसभा अध्यक्षांना दिले होते. त्यावर उद्या सुनावणी होणार होती. उत्तरात विधानसभा अध्यक्ष कोणता मुद्दा मांडणार होते, ते समजणार होतं. ठाकरे गटाचे आमदार सुनील प्रभू यांनी ही याचिका दाखल केली होती.

नार्वेकरांनी शिंदे गटाच्या 16 आमदारांच्या अपात्रतेबाबत केलं होतं मोठं भाष्य

शिंदे गटातील १६ आमदारांच्या अपात्रतेच्या निर्णय प्रक्रियेला वेग आला आहे. सुप्रीम कोर्टाने विधानसभा अध्यक्ष राहुल नार्वेकरांना ३१ जुलैपर्यंत मुदत दिली होती. शिंदे गटाच्या 16 आमदारांच्या अपात्रतेबाबत निर्णयावर राहुल नार्वेकर निर्णय देणार होते. या निर्णयाच्या पार्श्वभूमीवर विधानसभा अध्यक्ष राहुल नार्वेकर यांनी संविधानातील तरतुदींचे पालन करूनच योग्य निर्णय घेणार, असे म्हटले होते.