Summary -

• मध्य प्रदेशमध्ये भीषण अपघात

• पिकअप उलटल्यामुळे १२ जणांचा मृत्यू

• मृतांमध्ये २ लहान मुलांचा समावेश

• मजूरांना घेऊन हा पिकअप जात असताना ही घटना घडली

मध्य प्रदेशमध्ये बुधवारी रात्री भीषण रस्ते अपघाताची घटना घडली. या अपघातामध्ये २ लहान मुलांसह १२ जणांचा मृत्यू झाला. चिकलिया येथील रिलायन्स पेट्रोल पंपाजवळ हा अपघात झाला. मजुरांना घेऊन जाणारा पिकअप अनियंत्रित होऊन महामार्गावर उलटला. या अपघातामध्ये गंभीर जखमी झालेल्या १२ जणांनी जागीच प्राण सोडले. मृतांमध्ये २ लहान मुलांचा देखील समावेश आहे. या अपाघातानंतर घटनास्थळावर गोंधळाचे वातावरण निर्माण झाले.

मिळालेल्या माहितीनुसार, अपघाताची ही घटना रात्री साडेआठ वाजताच्या सुमारास घडली. पिकअपमध्ये क्षमतेपेक्षा जास्त मजूर बसले होते. अंदाजे ३० ते ३५ मजूर या पिकअपमध्ये होते अशी माहिती समोर आली आहे. भरधाव पिकअपवरील चालकाचे नियंत्रण सुटले आणि तो रस्त्याच्या मधोमध उलटला. या अपघातामध्ये पिकअपमधील सर्वजण रस्त्यावर फेकले गेले. यातच काही जणांचा जागीच मृत्यू झाला. मृतांचा आकडा १२ वर पोहचला आहे. यामध्ये दोन लहान मुलांचा समावेश आहे.

अपघाताचा आवाज ऐकून स्थानिक नागरिक घटनास्थळी पोहचले. त्यांनी तात्काळ पोलिसांना घटनेची माहिती दिली. पोलिसांनी स्थानिकांच्या मदतीने बचावकार्य करत जखमींना तात्काळ जिल्हा रुग्णालयात उपचारासाठी हलवले. जखमींवर सध्या रुग्णालयात उपचार सुरू आहेत. या अपघातामध्ये १३ कामगार गंभीर जखमी झाले आहेत. यामधील अनेकांची प्रकृती चिंताजनक आहे. त्यामुळे मृतांचा आकडा वाढण्याची शक्यता आहे. या अपघाताचा तपास पोलिस करत आहेत.