बेंगळुरूच्या चिन्नास्वामी स्टेडियमच्या बाहेर झालेल्या आरसीबीच्या विजयी मिरवणुकीत चेंगराचेंगरीची घटना घडली आहे. या दुर्घटनेत ८ जणांचा मृत्यू झाला आहे. रॉयल चॅलेंजर्स बेंगळुरुने ट्रॉफी जिंकल्यानंतर काढण्यात आलेल्या विजयी मिरवणुकीच्या जल्लोषाचं रुपांतर दु:खात बदललं आहे. या चेंगराचेंगरीत २० जण जखमी झाल्याची माहिती मिळत आहे.

आयपीएलच्या यंदाच्या सीझनमध्ये १८ वर्षानंतर आरसीबीने चषक जिंकला. या विजयाचा जल्लोष साजरा करण्यासाठी चिन्नास्वामी स्टेडियमच्या बाहेर हजारो चाहते जमा झाले होते. या स्टेडियमबाहेर लोकांना नीट उभे राहण्यासाठीही जागा नव्हती. या स्टेडियमबाहेरच चाहत्यांची चेंगराचेंगरी झाल्याची घटना घडली आहे.

चेंगराचेंगरीच्या या घटनेत ८ जणांचा मृत्यू झाला आहे. जखमींना रुग्णालयात दाखल केले असून त्यांच्यावर तातडीने उपचार सुरु करण्यात आले आहेत. चेंगराचेंगरीत जखमी झालेल्यांची प्रकृती गंभीर असल्याचे बोलले जात आहे. चेंगराचेंगरीच्या दुर्घटनेमुळे परिसरात खळबळ उडाली आहे.

मीडिया रिपोर्टनुसार, बेंगळुरुतील ही चेंगराचेंगरीची घटना गेट नंबर-१ जवळ घडली आहे. स्टेडियमवर पोहोचण्याआधी आरसीबीचे खेळाडू कर्नाटका विधानसभेत गेले होते. तिथे कर्नाटकातील मुख्यमंत्र्यांनी आरसीबीच्या सर्व खेळाडूंचा सन्मान केला. त्यानंतर खेळाडूंची बस चिन्नास्वामी स्डेडियकडे निघाली. आरसीबीच्या विजयी रॅलीच्या पार्श्वभूमीवर वाहतुकीसंदर्भातील सूचना प्रशासनाने जारी केल्या होत्या.

कर्नाटक राज्य क्रिकेट असोशिएशनद्वारे विशेष कार्यक्रमाचे आयोजन करण्यात आले होते. चेंगराचेंगरीची घटना घडल्यानंतर सुरक्षादलाने आरसीबीच्या संघाला सुरक्षित ठिकाणी पोहोचवलं आहे. चेंगराचेंगरीचा पहिली व्हिडिओ समोर आला आहे. या व्हिडिओमध्ये युवक एकमेकांच्या अंगावर पडल्याचे दिसत आहे. काही जण जखमींना रुग्णालयात घेऊन जाताना दिसत आहे.