दिल्लीतील बवाना परिसरात लव्ह ट्रायंगलमुळे तरूणावर अॅसिड हल्ला करण्यात आला आहे. ही धक्कादायक घटना ८ जानेवारीला घडली असून, बवाना परिसरातील शिवशंकर गल्लीत अज्ञात हल्लेखोरांनी तरूणावर अॅसिड हल्ला करत पळ काढलाय. पीडित तरूणाला खासगी रूग्णालयात दाखल करण्यात आलं असून, त्याच्यावर उपचार सुरू आहे.

या घटनेची माहिती मिळताच दिल्ली पोलिसांनी एफआयआर नोंदवून तपासाला सुरूवात केलीय. पीडित व्यक्ती प्रकाशवर अॅसिड हल्ला झाला होता. त्याच्यावर ज्या ठिकाणी अॅसिड हल्ला झाला, त्या ठिकाणचे १०० कॅमेरा फुटेज तपासण्यात आले. तपासणी केल्यानंतर पोलिसांना आरोपींची माहिती मिळाली. याच सीसीटीव्हीच्या आधारे पोलिसांनी आरोपीला अटक केलीय. पोलिसांनी दिलेल्या माहितीनुसार, मुकेश हा तरूण या घटनेचा सुत्रधार होता.

आरोपी आणि पीडितेचा एकाच मुलीवर प्रेम

आरोपी मुकेशची चौकशी केली असता, हे संपूर्ण प्रकरण लव्ह ट्रायंगलमधून घडली असल्याची माहिती आहे. खरंतर आरोपी आणि पीडितेचे एकाच मुलीवर प्रेम होते. यावरून वर्षभरापूर्वी मुकेश आणि पीडित व्यक्तीमध्ये भांडण झाले होते. भांडण झाल्यानंतर बदला घेण्यासाठी मुकेशने दोन मित्रांना घेऊन प्रकाशचा काटा काढण्याचा प्लॅन रचला. आधी मुकेश आणि त्याचे २ मित्र चारचाकी गाडीतून आले. नंतर प्रकाश याच्या चेहऱ्यावर अॅसिड हल्ला केला. नंतर आरोपीने पलायन केले.

प्रकाश याच्या चेहऱ्यावर अॅसिड हल्ला झाल्यानंतर त्याला रूग्णालयात दाखल करण्यात आले. या प्रकरणानंतर दिल्ली पोलिसांनी तातडीने घटनास्थळी धाव घेतली. नंतर तपास करीत आरोपीसह कार देखील ताब्यात घेतली. आरोपीला ताब्यात घेतल्यानंतर त्याने, 'ती माझी होऊ शकली नाही तर कुणाचीही होऊ शकणार नाही'. असं म्हणत त्याने हे भयंकर कृत्य केल्याचं कबूल केलं.