Delhi Crime News : देशभरात निक्की यादव हत्याकांड प्रकरण अजूनही शांत झाले नाही तोच देशाची राजधानी दिल्लीतून आणखी एक भयानक घटना समोर आली आहे. दिल्लीत एका महिलेचा मृत्यू झाला आहे. महिलेच्या लिव्ह-इन पार्टनरने तिच्यावर तारपीन तेल टाकून जिवंत जाळल्याचा धक्कादायक प्रकार दिल्लीत उघडकीस आला आहे. याप्रकरणी पोलिसांनी आरोपीविरोधात गुन्हा दाखल केला आहे. मोहित असं आरोपीचं नाव आहे.

या घटनेनंतर महिलेला रुग्णालयात (Hospital) दाखल करण्यात आले. जिथे सोमवारी महिलेचा मृत्यू झाला. मृत पीडितेचे तिच्या लिव्ह इन पार्टनरसोबत भांडण झाल्याची घटना 10 फेब्रुवारी रोजी घडली. संबंधित महिला आणि मोहित गेल्या सहा वर्षांपासून लिव्ह-इन रिलेशनशिप मध्ये राहत होते.

महिलेने मोहितला आपल्या मित्रांबरोबर अंमली पदार्थांचे सेवन करताना बघितले. यावरून दोघांमध्ये वाद झाला आणि हा वाद इतका विकोपाला गेला की मोहितने रागाच्या भरात महिलेवर तारपीनचं तेल टाकून तिला जिवंत जाळले.

या घटनेनंतर स्थानिकांनी महिलेला दिल्लीतील सफदरजंग रुग्णालयात दाखले केले. तसेच या घटनेची माहिती पोलिसांना दिली. घटनेची माहिती मिळताच पोलिसांनी तात्काळ रुग्णालयात धाव घेतली आणि महिलेचा जबाब नोंदवण्याचा प्रयत्न केला.

पीडित महिला तिच्या पहिल्या पतीला सोडून गेल्या 6 वर्षांपासून मोहित नावाच्या व्यक्तीसोबत लिव्ह इन रिलेशनशिपमध्ये राहत होती. महिलेला आठ वर्षांचा मुलगा तर चार वर्षांची दोन मुलगी आहे. दरम्यान, पोलिसांनी (Police) आरोपी मोहितविरोधात गुन्हा दाखल केला आहे.