केनियातून मोठी बातमी हाती आली आहे. केनियाच्या नकुरू काऊंटी येथील गिलगिलच्या अकॅडमीतील शाळेच्या हॉस्टेलला भीषण आग लागल्याची घटना घडली आहे. विद्यार्थिनींच्या हॉस्टेलला गुरूवारी पहाटे ३.३० वाजता आग लागली. या आगीच्या घटनेत १६ जणांच्या मृत्यू झाल्याची माहिती हाती आली आहे. तर एकूण ७४ विद्यार्थिनी जखमी झाल्या आहेत.

केनिया रेड क्रॉस माहितीनुसार, आग लागल्याची सूचना मिळताच आपात्कालीन सेवा, रुग्णवाहिका पथक घटनास्थळी पोहोचलं. प्रशासनाने आगीवर पूर्णपणे नियंत्रण मिळवण्याचा दावा केला आहे.

सुरुवातीला हॉस्टेलमधील १० विद्यार्थिनींच्या मृत्यू झाल्याची माहिती आली. परंतु हॉस्टेलला लागलेल्या आगीचा भडका वाढल्यानंतर आणखी विद्यार्थिनी आगीत होरपळल्या. त्यानंतर आणखी ६ विद्यार्थिनी आगीत दगावल्या. हॉस्टेलमधील इतर विद्यार्थिनींची स्थिती गंभीर असल्याचे सांगण्यात येत आहे.

केनियाचे राष्ट्राध्यक्ष विलियम रुटो यांनी घटनेनंतर शोक व्यक्त केला आहे. त्यांनी पीडित कुटुंबाप्रति संवेदना व्यक्त केल्या. त्यांनी बचाव कार्य, जखमींवर उपचार आणि पीडितांना आर्थिक मदत करण्यासाठी निर्देश दिले आहेत. तसेच त्यांनी आगीचे कारण शोधण्यासही सांगितलं आहे.

केनियामध्ये याआधी देखील आग लागल्याची घटना घडली होती. याआधी २००१ साली मचाकोस काऊंटीमध्ये भीषण आग लागण्याची घटना घडली होती. या आगीच्या घटनेत ६७ जणांचा मृत्यू झाला होता. या व्यतिरिक्त २०२४ आणि २०१७ साली आगीच्या दुर्घटना घडल्या होत्या. त्यामुळे शाळेच्या सुरक्षा व्यवस्थेवर प्रश्नचिन्ह उपस्थित करण्यात येत आहे.