कानपूरच्या कर्नलगंज पोलीस स्टेशन हद्दीतून एक धक्कादायक घटना समोर आली आहे. हुंडा न दिल्यामुळे पती आणि सासरच्यांनी महिलेला खोलीत डांबून ठेवलं. तसेच खोलीत साप सोडला. सापानं महिलेचा चावा घेतला. महिला ओरडत राहिली. परंतु तिला वाचवण्याऐवजी तिचे सासरचे मंडळी हसत राहिले. माहिती मिळताच बहिणीनं महिलेची सुटका केली, तसेच रूग्णालयात नेलं. सध्या तिची प्रकृती गंभीर असून, उपचार सुरू आहेत. या घटनेची माहिती मिळताच पोलिसांनी पतीसह सात जणांवर गुन्हा दाखल केला आहे.

दाखल तक्रारीनुसार, रेश्माचा विवाह १९ मार्च २०२१ रोजी कर्नलगंज येथील शहनवाज याच्यासोबत झाला होता. लग्नानंतर काही दिवसांनी सासरच्या लोकांनी महिलेचा छळ करण्यास सुरूवात केली. कमी हुंडा मिळाल्यामुळे सासरचे मंडळी नाराज होते. महिलेच्या वडिलांनी खोली बांधण्यासाठी दीड लाख रूपये दिले.

त्यानंतर आणखी ५ लाख रूपयांची मागणी केली. ५लाख रूपयांची मागणी पूर्ण न झाल्यामुळे सासरच्या मंडळींनी तिला वेगळ्या खोलीत झोपण्यास सांगितले. नंतर त्या खोलीत साप सोडण्यात आले. रात्री उशिरा तिच्या पायाला साप चावला. ती वेदनेनं तडफडत होती. मात्र, तिला वाचवायला कुणीच आलं नाही.

नंतर महिलेनं आपल्या बहिणीला फोन करून याची माहिती दिली. तिनं लगेच महिलेला रूग्णालयात नेले. तिच्यावर सध्या खासगी रूग्णालयात उपचार सुरू आहे. यानंतर महिलेच्या बहिणीनं पोलीस ठाण्यात धाव घेतली. तसेच सासरच्या मंडळींविरोधात तक्रार दाखल केली. तक्रारीच्या आधारे पोलिसांनी पती, सासू, सासरे, मेहूणे यांसह सासरच्यांविरोधात विविध कलमांखाली तक्रार दाखल करण्यात आली आहे. सध्या पोलिसांकडून अधिक तपास सुरू आहे.