कानपूरच्या बिठूर परिसरात एक भीषण आणि धक्कादायक घटना घडली आहे. वाराणसीतील अवघ्या १५ वर्षांच्या अल्पवयीन मुलीवर हॉस्टेलमध्ये तीन युवकांनी सामूहिक बलात्कार केल्याची धक्कादायक बाब समोर आलीये. शनिवारी पीडित मुलीने अपर सिव्हिल जज यांच्या न्यायालयात घडलेल्या घटनेची माहिती दिली.

हॉस्टेलमध्ये बंधक ठेवून केले अत्याचार

मंगळवारी रात्री सुमारे बारा वाजता पदम त्रिपाठी नावाच्या युवकाने रूम मिळवून देण्याच्या बहाण्याने मुलीला मंधना परिसरातील हॉस्टेलमध्ये नेलं. तिथे पोहोचताच त्याने निहाल सिंह आणि नितेश दुबे उर्फ बिल्लू यांना बोलावून घेतलं. यावेळी तिघांनी मिळून मुलीला तब्बल पाच तास बंधक ठेवून तिच्यावर अत्याचार केल्याची माहिती आहे. त्यानंतर तिला खोलीत सोडून आरोपी फरार झाले.

दुसऱ्या दिवशी सकाळी मुलीची अवस्था पाहून हॉस्टेलमधील एका तरूणाने या घटनेची पोलिसांना माहिती दिली. पोलीस तातडीने घटनास्थळी पोहोचले आणि पदम त्रिपाठीला अटक करून त्याची तुरूंगात रवानगी करण्यात आली आहे. याशिवाय त्याचे दोन साथीदार निहाल सिंह आणि नितेश दुबे यांना ५५ तासांच्या आत पकडण्यात पोलिसांना यश आलं आहे.

न्यायालयात साक्ष देताना मुलीने स्पष्ट सांगितलं की, पदम त्रिपाठीने तिला खोलीत नेलं आणि त्यानंतर तिघांनी मिळून तिच्यावर अत्याचार केला. मुलीच्या सांगण्याने संपूर्ण प्रकरणाची पुष्टी झाली.

सध्या तिन्ही आरोपींना तुरुंगात पाठवण्यात आलं असून पोलीस तपास अंतिम टप्प्यात आहे. यासंदर्भात लवकरच चार्जशीट दाखल होणार असल्याचं पोलीसांकडून सांगण्यात आलं आहे. या घटनेनंतर पीडितेला सुरक्षा आणि काऊंसिलिंगची व्यवस्था करून देण्यात आली आहे.