• जम्मू-काश्मीरमध्ये भीषण स्फोट

• राजौरीतील LOC जवळ भूसुरुंगाचा भीषण स्फोट

• एका JCO सहित ४ जवान गंभीर जखमी

• नौशेरा सेक्टरमधील गस्ती दरम्यान घडली घटना

जम्मू-काश्मीरच्या राजौरी जिल्ह्यामध्ये भीषण स्फोट झाल्याची घटना समोर आली आहे. राजौरीतील नियंत्रण रेषेजवळ भुसुरूंगाचा स्फोट झाला. मंगळवारी जवानांकडून सुरू असलेल्या नियमित गस्तीदरम्यान ही घटना घडली. अचानक भूसुरुंगाचा स्फोट झाला आणि यामध्ये ज्युनियर कमिशन्ड ऑफिसरसह ४ जवान जखमी झाले.

लष्करी अधिकाऱ्यांनी दिलेल्या माहितीनुसार, ही घटना राजौरी जिल्ह्यातील नौशेरा सेक्टरमधील कलाल भागात घडली. लष्कराच्या जवानांची एक तुकडी सीमेवर नियमित गस्त घालत असताना अचानक भूसुरुंगाचा मोठा स्फोट झाला. स्फोटाचा आवाज ऐकून सीमा भागात तैनात असलेल्या इतर जवानांनी घटनास्थळी धाव घेतली आणि त्यांनी बचावकार्य केले.

या स्फोटामध्ये जेसीओ आणि ३ जवान गंभीर जखमी झाले. त्यांना तात्काळ प्राथमिक उपचार देऊन रुग्णालयात दाखल करण्यात आले. या चौघांवर डॉक्टरांच्या देखरेखीखाली उपचार सुरू आहेत. तिघांची प्रकृती सध्या स्थिर आहे. या घटनेनंतर परिसरात गोंधळाचे वातावरण होते.

लष्कराच्या अधिकाऱ्यांनी सांगितले की, सीमेपलीकडून होणारी दहशतवादी घुसखोरी रोखण्यासाठी सुरक्षा उपाय म्हणून सीमा भागांमध्ये भूसुरुंग पेरले जातात. कधीकधी मुसळधार पाऊस आणि भूस्खलनामुळे हे भूसुरुंग त्यांच्या मूळ जागेवरून वाहून जाऊ शकतात आणि दुर्गम बनतात. या घटनेनंतर खबरदारीचा उपाय म्हणून सुरक्षा दलांनी परिसरातील शोधमोहीम तीव्र केली आहे.