Army major killed a month after marriage : राजस्थानमधील जैसलमेर लष्करी तळाजवळ (Jaisalmer Military Station) एक अत्यंत दुर्दैवी आणि भीषण अपघात घडला आहे. सैन्याच्या अधिकाऱ्यांच्या भरधाव एसयूव्ही (SUV) गाडीचा अपघात होऊन यामध्ये भारतीय लष्करातील एका ३२ वर्षीय मेजरचा (Major) जागीच मृत्यू झाला, तर अन्य दोन लेफ्टनंट दर्जाचे अधिकारी गंभीर जखमी झाले आहेत.

मिळालेल्या माहितीनुसार, मध्यरात्री हे तिन्ही अधिकारी आपल्या वैयक्तिक एसयूव्ही कारने जात होते. पण अचानक चालकाचे गाडीवरील नियंत्रण सुटले. त्यामुळे भरधाव गाडी थेट रस्त्याच्या कडेला असलेल्या एका विजेच्या खांबावर आणि भिंतीवर जाऊन जोरदार धडकली. ही धडक इतकी भीषण होती की गाडीचा चक्काचूर झाला. अपघाताचा आवाज ऐकून स्थानिक नागरिक आणि सैन्याच्या पथकाने तात्काळ घटनास्थळी धाव घेत तिघांनाही रुग्णालयात दाखल केले. मात्र, डॉक्टरांनी मेजर अधिकाऱ्याला मृत घोषित केले. इतर दोन जखमी अधिकाऱ्यांवर सध्या लष्करी रुग्णालयात उपचार सुरू आहेत. त्यांची प्रकृती गंभीर असल्याचे सांगितले जात आहे.

जैसलमेर मिलिटरी स्टेशनजवळ गुरुवारी रात्री उशिरा अपघात झाल्याची नोंद करण्यात आली आहे. अधिकाऱ्यांनी दिलेल्या माहितीनुसार, ३ लष्करी अधिकारी खासगी एसयूव्हीमधून जैसलमेर लष्करी तळावर परत येत होते. जवळ आल्यानंतर एक उंट अचानक रस्त्यावर आला. त्यामुळे चालकाचे कारवरील नियंत्रण सुटले अन् विजेच्या खांबाला धडकून पलटी झाली. कारचा वेग जास्त असल्यामुळे अपघातानंतर ती १०० मीटर फरफटत गेली होती.

अपघाताची माहिती मिळताच लष्करी जवान आणि अधिकारी घटनास्थळी दाखल झाले. वाहनाचा चक्काचूर झाल्यानंतर त्यात अडकलेल्या तिन्ही अधिकाऱ्यांना बाहेर काढून जैसलमेर लष्करी तळावरील लष्करी रुग्णालयात नेण्यात आले. मध्य प्रदेशातील इंदूरचे रहिवासी असलेले ३० वर्षीय मेजर हमजा आरिफ यांचे उपचारादरम्यान निधन झाले. त्यांचे लग्न महिनाभरापूर्वीच झाले होते. लेफ्टनंट अभिनव राठोड आणि लेफ्टनंट आयुष्मान गुसाईन या दोन जखमी अधिकाऱ्यांवर लष्करी रुग्णालयात उपचार सुरू आहेत. या घटनेमुळे जैसलमेर लष्करी तळावर शोककळा पसरली आहे.