Jaipur Wall Collapse: राजस्थानची राजधानी जयपूरजवळ सोमवारी भीषण दुर्घटना घडली. आमेर परिसरातील ताला मोडजवळ बांधकामाधीन रिटेनिंग (आधार) भिंत अचानक कोसळल्याने तीन मजुरांचा मृत्यू झाला, तर अनेक मजूर ढिगाऱ्याखाली अडकल्याची भीती व्यक्त करण्यात येत आहे. घटनेनंतर परिसरात एकच खळबळ उडाली असून प्रशासनाने तातडीने मोठे बचाव कार्य सुरू केले आहे.

मिळालेल्या माहितीनुसार, दुर्घटनेच्या वेळी अनेक मजूर बांधकामाच्या ठिकाणी काम करत होते. अचानक भिंतीचा मोठा भाग कोसळल्याने मजुरांना बाहेर पडण्याची संधीही मिळाली नाही. काही कामगार ढिगाऱ्याखाली दबले गेले, तर काही जण जखमी झाल्याचे सांगितले जात आहे. घटनेची माहिती मिळताच पोलीस, अग्निशमन दल, आपत्ती व्यवस्थापन पथके आणि स्थानिक प्रशासन घटनास्थळी दाखल झाले.

बचाव पथकांनी जेसीबी आणि इतर यंत्रसामग्रीच्या सहाय्याने ढिगारा हटवण्याचे काम सुरू केले आहे. अडकलेल्या मजुरांचा शोध घेण्यासाठी युद्धपातळीवर प्रयत्न सुरू असून जखमींना तातडीने जवळच्या रुग्णालयात उपचारासाठी दाखल करण्यात आले आहे. मृतांचा आकडा वाढण्याची शक्यता प्रशासनाने व्यक्त केली आहे.