मध्य प्रदेशातील इंदूरमधून धक्कादायक घटना समोर आली आहे. दूषित पाणी प्यायल्यामुळे १५ निष्पाप नागरिकांचा मृत्यू झाला आहे. या घटनेत अनेक जण अद्याप गंभीर असून त्यांच्यावर उपचार सुरू आहेत. संबंधित वसाहतीमध्ये गेल्या काही दिवसांपासून दूषित पाणीपुरवठा होत होता. शुद्ध पाणी समजून रहिवाशांनी ते प्राशन केले आणि ही मोठी दुर्घटना घडली. या घटनेने पिण्याच्या पाण्याच्या शुद्धतेचा प्रश्न पुन्हा एकदा ऐरणीवर आला आहे.

मिळालेल्या माहितीनुसार, २९ डिसेंबर रोजी इंदूरच्या भगीरथपुरा येथील रहिवाशी अचानक आजारी पडू लागले. सुरुवातीला त्रास होणाऱ्या काही जणांना रुग्णालयात दाखल करण्यात आलं. हळूहळू हा आकडा वाढतच गेला. दरम्यान याचा तपास केला असता अतिसाराची लागण झाल्याचं समोर आलं. रुग्णांना झालेली ही अतिसाराची लागण पिण्याच्या दूषित पाण्यामुळेच झाल्याचे प्रयोगशाळेतील तपासणीमध्ये सिद्ध झाले आहे.

इंदूरचे मुख्य वैद्यकीय आणि आरोग्य अधिकारी डॉ. माधव प्रसाद हसनी यांनी पत्रकारांना सांगितले की, ‘भगीरथपुरा भागात एका गटाराच्या वाहिनीतून गळती झाल्याने पिण्याचे पाणी दूषित झाले आहे. तेथूनच या साथीचा प्रादुर्भाव झाला.’ या दूषित पाण्याने आतापर्यंत १५ जणांचा निष्पाप बळी गेला असून अद्यापही ३२ नागरिक आयसीयूमध्ये दाखल आहेत. तर २०० नागरिकांवर रुग्णालयात उपचार सुरु आहेत. आजाराची लग्न झालेल्या नागरिकांचा एकूण आकडा १४०० वर गेला आहे.

दरम्यान १५ बळी गेल्यानंतर राज्य सरकार खडबडून जागे झाले आहे. इंदूर महापालिकेचे आयुक्त दिलीपकुमार यादव यांना ‘कारणे दाखवा’ नोटीस बजावण्यात आली आहे. अतिरिक्त आयुक्त रोहन सिसोनिया यांची बदली करण्यात आली असून, पाणीपुरवठा विभागाचे अधीक्षक अभियंता प्रदीप निगम यांना निलंबित करण्यात आले आहे. मुख्यमंत्री मोहन यादव यांनी राज्यातील सर्व १६ महापालिकांचे महापौर, आयुक्त, जिल्हाधिकारी यांची तातडीने बैठक बोलावली. इंदूरमधील दूषित पाणीपुरवठ्यासाठी दोषी असलेल्यांवर कठोर कारवाई करण्यात आली आहे.