भारत सरकार रेल्वे प्रवासाचा पूर्णपणे कायापालट करण्याचे दिशेने वेगाने पाऊल उचलत आहे. प्रवाशांना जागतिक दर्जाच्या सुविधा आणि वंदे भारत रेल्वेच्या संख्या वाढवण्यासाठी चालू वर्षात 2700 कोटी रुपयांहून अधिक खर्च करणार असून तब्बल 27 नव्या सेमी हायस्पीड वंदे भारत ट्रेन तयार करणार आहेत. देशातील तीन प्रमुख कारखान्यांमध्ये या ट्रेनच्या निर्मितीचे काम युद्धपातळीवर सुरू आहे.

सध्या देशभरात चेअरकार आणि स्लीपर मिळून 100 हून अधिक वंदे भारत ट्रेन ही रुळावर धावत आहेत. मात्र, यंदाचे हे वर्ष वंदे भारत ट्रेन उत्पादनाच्या दृष्टीने सर्वात मोठे वर्ष ठरण्याची शक्यता आहे. मिळालेल्या माहितीनुसार, या आर्थिक वर्षात 27 नवीन ट्रेन उत्पादन करण्याचे उद्दिष्ट आहे. प्रवाशांची मागणी आणि गरज लक्षात घेता ही संख्या आणखी वाढू शकते, चेन्नईतील इंटिग्रल कोच फॅक्टरी, रायबरेतील मॉडर्न कोच फॅक्टरी आणि कपूरथळा रेल कोच फॅक्टरी या ठिकाणी या ट्रेनच्या निर्मितीचे काम सुरू आहे.

1000 वंदे भारत ट्रेनचा मेगा प्लॅन

भारतीय रेल्वेने भविष्याचा विचार करून 1000 वंदे भारत ट्रेन तयार करण्याचे उद्दिष्ट ठेवले आहे. 8,16 आणि 24 डब्यांचे विविध ट्रेन सेट तयार केले जाणार आहेत. यामध्ये चेअरकार आणि स्लीपर अशा दोन्ही प्रकारच्या ट्रेनचा समावेश असेल. या प्रकल्पासाठी 35 हजार कोटी रुपयांचा निधी मंजूर करण्यात आला आहे. मागणी आणि गरजेनुसार ट्रेन देशातील विविध मार्गांवर सुरू केल्या जाणार आहेत.

वंदे भारतनंतर भारतीय रेल्वे आता आणखी वेगवान ट्रेनच्या दिशेने वाटचाल करत आहे. ICF चेन्नई आणि BEML यांच्या सहकार्याने ताशी 280 किलोमीटर वेगाने धावणारी स्वदेशी हायस्पीड ट्रेन विकसित केली जात आहे. ही स्वदेशी हायस्पीड ट्रेन देशात विकसित होत असलेल्या मुंबई-अहमदाबाद हायस्पीड ट्रेन बुलेट ट्रेनच्या मार्गावर धावण्याची शक्यता आहे. LHB ट्रेन सेटची किंमत सुमारे 80 कोटी रुपये वंदे भारत किंमत 100 कोटी रुपायांपेक्षा जास्त असणार आहे. त्यानुसार 27 वंदे भारत ट्रेनच्या निर्मितीसाठी सुमारे 2700 कोटी रुपयांचा खर्च अपेक्षित आहे.

भारतीय रेल्वेच्या या विस्तारामुळे देशातील सेमी-हायस्पीड रेल्वेचे जाळे मोठ्या प्रमाणात पसरणार असून, भविष्यात प्रवाशांना अधिक वेगवान, आधुनिक आणि आरामदायी रेल्वे प्रवासाचा पर्याय उपलब्ध होणार आहे.