Train ticket price increase July : रेल्वेने प्रवास करणाऱ्यांच्या खिशाला आता चाप बसणार आहे. कारण भारतीय रेल्वेने एक जुलै 2025 पासून तिकिटांच्या किंमतीत वाढ केली आहे. सर्व सामान्य प्रवाशांसोबतच (जनरल) एसीने प्रवास करणाऱ्यांना तिकिटासाठी आता अतिरिक्त पैसे द्यावे लागणार आहे. दिलासादायक म्हणजे, हा बदल फक्त ५०० किमीपेक्षा जास्त अंतरासाठी असेल. त्याशिवाय काही श्रेणींसाठी भाडेवाढ करण्यात आलेली नाही.

रेल्वेच्या नव्या तिकिट दरानुसार, सेकंड क्लासच्या (Second Class) तिकिटासाठी ५०० किमीपर्यंतच्या प्रवासासाठी कोणताही वाढ झालेली नाही. पण हा प्रवास ५०० किमीपेक्षा जास्त असेल तर प्रति किमी अर्धा पैसा जास्त तिकिट द्यावे लागले. त्याशिवाय मेल, एक्सप्रेस ट्रेनमधील नॉन एसी प्रवाशांना प्रति किमोमीटर एक पैसा जास्त द्यावा लागणार आहे. एसीच्या तिकिट दरांमध्ये प्रति किमी २ पैशांनी वाढ करण्यात आली आहे.

दिलासादायक म्हणजे, मुंबई लोकलसह इतर शहरी ट्रेनच्या तिकिटाच्या दरामध्ये कोणताही बदल करण्यात आलेला नाही. त्याशिवाय मासिक पासच्या दरांमध्येही कोणतीही वाढ करण्यात आलेली नाही. मीडिया रिपोर्ट्सनुसार, रेल्वेने यापूर्वीही तिकीट बुकिंग नियमांमध्ये बदल केला आहे. यापूर्वी कन्फर्म तिकिटाचा चार्ट २४ तास आधीच जारी केला जाईल. याआधी तिकीट बुक केल्यास प्रवासाच्या चार तास आधी तिकिट कन्फर्म झाले की नाही समजत होते.

रेल्वेकडून नवीन तिकीट बुकिंगच्या प्रणालीची तयारी करण्यात येत आहे. याबाबतची चाचपणी करण्यात येत आहे. राजस्थानमध्ये 6 जूनपासून प्रायोगिक तत्वावर नव्या दरानुसार तिकिटांची विक्री केली जात आहे. सध्या फक्त एका ट्रेनपुरती मर्यादित हा प्रयोग सुरू आहे. आतापर्यंत यात कोणतीही अडचण आलेली नाही, असे रेल्वेच्या अधिकाऱ्याकडून सांगितले.