पहलगाममध्ये झालेल्या भ्याड दहशतवादी हल्ल्यानंतर संपूर्ण भारतभरातून तीव्र संताप व्यक्त केला जात आहे. भारतानेही पाकिस्तानविरोधात आक्रमक पावले उचलण्यास सुरुवात केली असून, आतापर्यंत दहशतवाद्यांची एकूण पाच घरे जमीनदोस्त करण्यात आली आहेत. आधी दोन दहशतवाद्यांची घरे उद्ध्वस्त करण्यात आली होती, तर आता आणखी तीन दहशतवाद्यांची घरे उध्वस्त करण्यात आली आहेत.

दहशतवाद्यांची घरे जमीनदोस्त

पहलगाममध्ये झालेल्या दहशतवादी हल्ल्यानंतर भारताने काही करारांना स्थगिती देण्यासह दहशतवाद्यांची घरे जमीनदोस्त केले आहेत. लष्कर ए तोएबा या संघटनेत सक्रिय असलेल्या शाहिद अहमद कु्ट्टी याचे घर आयआयटी ब्लास्ट लावून उद्धवस्त केलं आहे. शुक्रवारी रात्री १० वाजेच्या सुमारास तपास यंत्रणेचे अधिकारी यांनी शाहिद अहमद कु्टे याच्या घरी जाऊन कुटुंबाला ताब्यात घेतलं. नंतर रात्री १ वाजेच्या सुमारास दहशतवाद्याच्या घरी ब्लास्ट करून घर उद्धवस्त केलं.

यासह पुलवामा भागातील एहसान उल हक शेख या दहशतवाद्याचं घर, कुलगाममधील झकीर अहमद गानियाचं घर, शोपियाँमध्ये शाहीद अहमद कुटे या दहशतवाद्याचं घर ब्लास्ट घडवून आणून जमीनदोस्त केलं. दरम्यान, शुक्रवारी दहशतवादी आसिफ शेख आणि आदिल गुरी याचंही घर पाडण्यात आल्याची माहिती समोर आली आहे.

पहलगाममध्ये सर्च ऑपरेशन सुरू

पहलगाममधील बैसरन घाटात झालेल्या दहशतवादी हल्ल्यानंतर भारतीय लष्कराचे जवान अॅक्शन मोडमध्ये आले आहेत. बांदिपोरा भागात कुलनार येथे चकमकीत १ दहशतवादीची हत्या झाल्याची माहिती आहे. तर, २ सैनिक जखमी झालेत. दरम्यान अजूनही शोधमोहिम सुरू आहे. काश्मीरच्या शोपियाँ आणि पहलगाममधील दहशतवादी घरांची झडती सुरू असून, शेकडो संशयितांना ताब्यात घेण्यात आले आहे.