प्रेमसंबंधाची माहिती मिळताच मुलीच्या संतप्त वडिलांनी प्रियकराची निर्घृण हत्या केली आहे. कुऱ्हाडीने वार करून प्रियकराला संपवलं आहे. ही धक्कादायक घटना तेलंगणातील पेद्दापल्ली जिल्ह्यात घडली आहे. पोलिसांना या घटनेची माहिती मिळताच त्यांनी आरोपी वडिलांना अटक केली आहे. या प्रकरणी पुढील तपास पोलीस करीत आहेत. या हत्याकांडामुळे परिसरात खळबळ उडाली आहे.

पोलिसांनी दिलेल्या माहितीनुसार, मृत तरूणाचे नाव साई कुमार असे आहे. त्याचे गावातील एका १९ वर्षीय मुलीवर प्रेम जडले होते. दोघेही वेगवेगळ्या जातीतील होते. आपल्या मुलीचे दुसऱ्या जातीच्या मुलासोबत प्रेमसंबंध जुळल्याचे लक्षाच येताच तिच्या पालकांना राग अनावर झाला. काही दिवसांपूर्वी मुलीच्या वडिलांनी कुमारला मुलीपासून दुर राहण्यास सांगितले. पण धमकी देऊनही जोडपे एकमेकांना भेटत राहिले.

पोलिसांनी सांगितले की, मुलीच्या वडिलांनी कुमारला धमकी दिली होती. परंतु, तरीही त्याने त्यांचे ऐकले नाही. गुरूवारी कुमारचा वाढदिवस होता. संतप्त वडिलांनी कुमारच्या हत्येचा कट रचला. त्यांनी कुऱ्हाडीने कुमारवर हल्ला केला. या हल्ल्यात कुमार गंभीर जखमी झाला. कुमारला तातडीने रूग्णालयात नेण्यात आले. पण वाटेतच त्याचा मृत्यू झाला.

या प्रकरणाची माहिती मिळताच त्यांनी घटनास्थळी धाव घेतली. तसेच चौकशी करून मुलीच्या वडिलांना पोलिसांनी अटक केली आहे. या प्रकरणी पुढील कारवाई केली जात असल्याचं पोलिसांनी सांगितलं.