Heartbreaking Uttarakhand tragedy 2025 floods : नद्यांना पूर, दरडी कोसळल्या, लोकांचे संसार उघड्यावर पडले. जनावरेही वाहून गेली. जिकडे पाहावे तिकडे फक्त अन् फक्त पाणी, चिखल, पडलेली घरे अन् मलबाच. उत्तर भारतात सध्या ही भयान परिस्थिती आहे. बचाव पथक दिवसरात्र मदतीसाठी उत्तराखंडमध्ये तळ ठोकून आहेत. गाव-शहरातील मलबा काढताना काळजाचा ठोका चुकवणाऱ्या घटना समोर येत आहेत. उशीच एक घटना उत्तराखंडमधील चमोलीत समोर आली. मलब्याखाली आई आणि जुळ्या मुलांचे मृतदेह मिळाले. ते दृश्य पाहून उपस्थित असणाऱ्या प्रत्येकाचे मन थरारले. कारण, मलब्याखाली आईच्या कुशीत दोन्ही जुळी मुलं होती. आईने शेवटच्या श्वासापर्यंत मुलांना वाचवण्याची धडपड केली. जिवाची बाजी लावली पण माऊलीला आपल्या काळजाचा तुकडा काही वाचवता आला नाही. आई आणि दोन जुळ्या मुलांचे मृतदेह पाहून बचाव पथक आणि स्थानिक स्तब्ध झाले. ही हृदय पिळवटणारी घटना पाहून चकार शब्दही निघाला नाही.

हृदय पिळवटणारी घटना

उत्तराखंडमधील चमोली येथील नंदानगरमध्ये ही हृदय पिळवटणारी घटना समोर आली. पावसाने क्षणात होतं नव्हते ते हिरावून नेलं. त्यात आई आणि दोन्ही मुलांचा मृत्यू झाला. त्यांचे मृतदेह मलब्याखाली बचावपथकाला आढळले. या दुर्देवी घटनेचे फोटोने अख्ख्या गावात हळहळ व्यक्त करण्यात येत आहे. आई अन् दोन जुळ्या मुलांच्या मृत्यूने सर्वांच्या डोळ्यात अश्रूंचा पूर आला असेल.

बापाच्या डोळ्यातून अश्रूंचा पूर -

मिळालेल्या माहितीनुसार, नंदानगरमध्ये बचाव पथकाकडून सर्च ऑपरेशन करण्यात येत आहे. मलब्याखाली अडकलेल्यांचा शोध घेतला जातोय. त्यावेळी तीन मृतदहे मिळाली. दोन्ही जुळी मुलं आईच्या छातीला चिपकलेले होते. येथील कुंवर सिंह परिवारातील या तिघांचा अतिशय करूण अंत झाला. १६ तास मलब्याखाली अडकल्यानंतर कुवंर सिंह जिवंत मिळाले. पण त्यांच्यासाठी सर्वस्व असणारी बायको अन् दोन्ही मुलं या जगात नव्हती. बायको अन् मुलांचा मृत्यू झाल्याचे समजताच डोळ्यातून अश्रूंचा पूर आला.

१७ सप्टेंबर रोजी उत्तराखंडमधील नंदानगरमध्ये आभाळ फाटल्यासारखा पाऊस पडला. या पावसामुळे क्षणात होत्याचे नव्हते झाले. अनेकांचा संसार उघड्यावर आला. शेतीचे नुकसान तर झालेच. पण घरे दारेही पडली. या दुर्घटनेत ८ जण बेपत्ता झाल्याचे समोर आले. तात्काळ SDRF आणि NDRF, स्थानिक बचाव पथकाकडून सर्च ऑपरेशन हातात घेण्यात आले. १८ तारखेला कुंवर सिंह यांना वाचवण्यात यश आले. पण दुसऱ्या दिवशी कुंवर सिंह यांच्या दोन जुळ्या मुलांचा आणि बायकोचा मृतदेह मिळाला. आईच्या कुशीत दोन्ही जुळी मुलं चिखलात माखलेली होती. दे दृश्य पाहून प्रत्येकाचा थरकाप उडला. दोन्ही मुलं फक्त १० वर्षांची होती. आयुष्य सुरूवात होण्याआधीच काळाने हिरावले. आईने जिवाच्या आकांताने शेवटपर्यंत पोटच्या गोळ्याला वाचवण्याचा प्रयत्न केला. पण निसर्गाच्या प्रकोपापुढे तीही हारली. तिघांचाही करूण अंत झाला.