हरियाणाच्या फरीदाबादमध्ये दिवसाढवळ्या धक्कादायक घटना घडली आहे. एका तरुणाने बारावीच्या विद्यार्थिनीचा पाठलाग करून बंदूकीतून गोळ्या झाडल्याची घटना समोर आली आहे. सोमवारी सायंकाळी संपूर्ण प्रकार घडला. ही घटना सीसीटीव्ही कॅमेरात कैद झाली आहे. या गोळीबारात विद्यार्थिनी जखमी झाली आहे.

बारावीत शिकणारी विद्यार्थिनी ग्रंथालयातून घरी निघाली होती. त्याचवेळी दबा धरून बसलेल्या तरुणाने विद्यार्थिनीवर गोळीबार केला. या गोळीबारात तरुणी जखमी झाली. या घटनेनंतर आरोपी घटनास्थळावरून फरार झाला.

व्हिडिओमध्ये काय दिसत आहे?

सीसीटीव्ही फुटेजमध्ये स्पष्ट दिसत आहे की, मुलगा दुचाकीजवळ वाट पाहत होता. त्याचवेळी एक मुलगी मैत्रिणीसोबत फोनवर बोलत चालताना दिसत आहे. त्याचवेळी एक मुलगा अचानक समोर आला. तरुणीवर फार जवळून गोळीबार केला. गोळीबारानंतर रस्त्यावर परिसरात खळबळ उडाली. पोलिसांना या गोळीबाराविषयी सोमवारी सायंकाळी ५.३० वाजता माहिती मिळाली.

पोलिसांनी दिलेल्या माहितीनुसार, जखमी तरुणी ही तरुणाला गेल्या एका वर्षांपासून ओळखत आहे. दोघे ग्रंथालयात एकत्र अभ्यास करायचे. मागील १५ दिवसांपासून दोघांनी बोलणं बंद केलं होतं. त्यामुळे तरुण नाराज होता. तरुणीने तरुणाकडे दुर्लक्ष केलं होतं. परंतु सोमवारी तरुणाने थेट जीवे मारण्यासाठी गोळीबार केला'

'सीसीटीव्ही फुटेजमध्ये स्पष्ट दिसत आहे की, तरुणाने तरुणीच्या जवळ जाऊन गोळीबार केला. मात्र, बंदूकीची गोळी तरुणीच्या डाव्या हाताच्या खांद्याला गोळी लागली. या गोळीबारात तरुणी जखमी झाली. गोळीबारानंतर तरुण पिस्तूल फेकून घटनास्थळावरून फरार झाला. पोलिसांनी पिस्तूल जप्त केलं आहे. तरुणीच्या विधानावर सिटी बल्लभगड पोलीस स्टेशनमध्ये सोमवारी रात्री हत्येचा प्रयत्न प्रकरणी गुन्हा नोंदवला आहे.