हरियाणाच्या सोनीपत जिल्ह्यातील गोहाना सोनीपत रोडवरील खेडी दमकन बायपासवर एक भीषण अपघाताची घटना घडली आहे. ट्रॅक्टर-ट्रोली आणि चारचाकी गाडीचा समोरासमोर टक्कर झाली. मध्य रात्री घडलेल्या या अपघातात दांपत्य आणि त्यांच्या मुलीचा मृत्यू झाला. तर, तिघे जण गंभीर जखमी झाले आहेत. माहितीनुसार, भिवानी येथील सत्संग कार्यक्रमात सहभाग होऊन कुटुंब घरी जात होते. परतत असताना अपघात घडला. सध्या या घटनेचा अधिक तपास पोलिसांकडून सुरू आहे.

अशोक, त्याची पत्नी आशु आणि त्यांची मुलगी चेष्टा असे अपघाती मृत झालेल्यांची नावे आहेत. मिळालेल्या माहितीनुसार, भिवानी येथील सत्संग कार्यक्रमात सहभागी होऊन हे कुटुंब त्यांच्या गावी बिधलच्या दिशेनं रवाना झाले. मध्य रात्रीच्या सुमारास कुटुंब चारचाकीतून निघाले. दरम्यान, गाडी खेडी दमकन बायपासवर पोहोचली. तेव्हा गवतानं भरलेली ट्रॅक्टर ट्रोली अचानक चारचाकीच्या बाजूला धडकली.

यामुळे दोन्ही वाहनांमध्ये जोरदार टक्कर झाली. अशोक त्याच्या पत्नी आणि मुलीसह पुढच्या सीटवर बसला होता. तर, चारचाकीच्या मागच्या सीटवर सरिता, त्यांची मुलगी सृष्टी आणि गावातील मुलगा विरेंद्र बसला होता. या तिघांनी अशोककडे लिफ्ट मागितली होती. धडक इतकी जोरदार होती ती, चारचाकीचा पूर्ण चेंदामेंदा झाला.

चारचाकीच्या समोर बसलेल्या तिघांचा जागीच मृत्यू झाला. तर, मागे बसलेले सरिता, सृष्टी आणि वीरेंद्र हे गंभीर जखमी झाले. घटनेची माहिती मिळताच पोलिसांनी घटनास्थळी धाव घेतली. तसेच जखमींना तातडीने उपचारासाठी रूग्णालयात पाठवले. तसेच मृतदेह ताब्यात घेत शवविच्छेदनासाठी रूग्णालयात पाठवले. प्राथमिक तपासात ट्रॅक्टर चालकाच्या निष्काळजीपणामुळे हा अपघात घडल्याचं समोर आलं आहे. पोलिसांनी ट्रॅक्टर चालकाविरोधात गुन्हा दाखल केला आहे. सध्या या प्रकरणाचा अधिक तपास पोलिसांकडून सुरू आहे.