गुजरातमध्ये भीषण रस्ते अपघाताची घटना घडली आहे. गुजरातच्या आनंद जिल्ह्यात अहमदाबाद-वडोदरा एक्स्प्रेस हायवेवर ट्रक आणि बसमध्ये भीषण अपघात झाला. ट्रक आणि बसमध्ये समोरासमोर धडक होऊ झालेल्या अपघातामध्ये ६ जणांचा मृत्यू झाला. तर ८ जण गंभीर जखमी झाले आहेत. जखमींवर रुग्णालयात उपचार सुरू आहेत.

मिळालेल्या माहितीनुसार, बस महाराष्ट्रातून राजस्थान येथे जात होती. त्याचवेळी या बसला आनंद जिल्ह्यातील अहमदाबाद-वडोदरा एक्स्प्रेस हायवेवर अपघात झाला. अपघाताची ही घटना पहाटे साडेचारच्या सुमारास घडली. बस आणि ट्रकची जोरदार धडक झाली. हा अपघात इतका भीषण होता की ३ जणांचा जागीच मृत्यू झाला. तर ११ जण जखमी झाले.

घटनेची माहिती मिळताच, गुजरात पोलिसांनी घटनास्थळी धाव घेत जखमींना तात्काळ रुग्णालयामध्ये दाखल केले. जखमींमधील ३ जणांचा रुग्णालयामध्ये उपचारासाठी दाखल केले असता त्यांचा मृत्यू झाला. या अपघातामध्ये एकूण ६ जणांचा मृत्यू झाला. तर ८ जण गंभीर जखमी झालेत. जखमींवर वेगवेगळ्या रुग्णालयात उपचार सुरू असून त्यांची प्रकृती गंभीर आहे.

हा अपघात झाला तेव्हा लक्झरी बस पंक्चर झाली होती. त्यामुळे बस हायवेच्या बाजूला उभी होती. चालक, क्लिनर आणि प्रवासी बसखाली उभे होते. त्याचवेळी पाठीमागून येणाऱ्या ट्रकने बसला जोरदार धडक दिली. या भीषण अपघातात सहा जणांना आपला जीव गमवावा लागला. महामार्गावर झालेल्या अपघाताची माहिती मिळताच आनंद अग्निशमन दल, एक्स्प्रेस हायवे पेट्रोलिंग पथक आणि आनंद ग्रामीण पोलिसांनी घटनास्थळी धाव घेऊन मदतकार्य केले.