Gold Silver Price : तुम्ही जर सोने-चांदी खरेदी करायचा विचार करत असाल, तर तुमच्यासाठी अत्यंत महत्वाची बातमी आहे. कारण, ऐन लग्नसराईच्या हंगामात सोने-चांदी दरात मोठी वाढ झाली आहे. आज हनुमान जयंतीच्या दिवशी सोने-चांदी दराने उच्चांक गाठला आहे. सराफा बाजार उघडताच, बुधवारी सोन्या-चांदीच्या दरात मोठी वाढ झाली. या वाढीनंतर सोन्याने पुन्हा एकदा महागाईचा जुना विक्रम मोडून नवा विक्रम केला आहे. (Latest Marathi News)

 सोने-चांदी (Gold And Silver Price) दर हे जागतिक बाजारावर आधारभूत असतात. मागील काही दिवसांपासून जागतिक बाजारात सोने-चांदी दरात वाढ होत आहे. याचा परिणाम भारतीय सराफा बाजारावरही दिसून येत आहे. मागील आठवडाभरापासून भारतीय सराफा बाजारात सोने-चांदी दरात सातत्याने वाढ होत आहे.

आजचा सोन्याचा भाव काय?

बुधवारी सराफा बाजारात  सोन्याच्या (Gold Price) दरात तब्बल १ हजार ०६६ रुपयांची वाढ झाली होती. त्यामुळे सोन्याचा भाव प्रतितोळा ६० हजार ८८१ इतका झाला होता. गुरूवारी सुद्धा सोन्याच्या भावात तेजी आली. सराफा बाजार उघताच सोन्याच्या दरात ५०० रुपयांची वाढ झाली. त्यामुळे २४ कॅरेट शुद्धतेच्या सोन्याचा भाव प्रतितोळा ६१ हजार ३३१ इतका झाला आहे.

आजचा चांदीचा भाव काय?

दुसरीकडे सोन्याबरोबर चांदीच्या (Silver Price) दरातही मोठी वाढ झाली आहे. बुधवारी सराफा बाजारात चांदीचा भाव २ हजार १३४ रुपयांनी वाढ झाली होती. त्यामुळे १ किलो चांदीचा दर ७६ हजार ८३४ वर पोहचला होता. गुरूवारी चांदीच्या दरात घसरण होईल, असं अनेकांना वाटत होतं. मात्र, सराफा बाजार उघताच चांदीचे दरही झपाट्याने वर गेले. आज सराफा बाजारात १ किलो चांदीचा दर ७७ हजार ९० इतका आहे.

सोने-चांदी दर वाढण्याची कारणं काय?

कमोडिटी मार्केट तज्ज्ञांच्या मते, अमेरिकन डॉलरमधील कमजोरी, कमकुवत यूएस डेटा, यूएस फेडद्वारे व्याजदरात वाढ, आर्थिक अनिश्चितता आणि कच्च्या तेलाच्या वाढत्या किमती. या ५ कारणांमुळे सोन्या-चांदीचे दर वाढत आहेत. भारतात, सोन्याला ५९,५०० च्या जवळ मजबूत आधार मिळाला, तर आंतरराष्ट्रीय बाजारात पिवळ्या धातूला २,०१० डॉलर इतका मजबूत आधार मिळाला. त्याचप्रमाणे आंतरराष्ट्रीय बाजारात चांदीच्या दराला 23 डॉलर प्रति औंसच्या जवळ मजबूत आधार मिळाला आहे.

Edited by - Satish Daud